3 سنوات على واحد من أسعد أيام حياتي 6 أبريل

مش عارفة ليه ثورات العمال بيبقى ليها مزاق خاص عندي و مكانة عزيزة

يمكن علشان بحس انهم الطبقة اللي المفروض بجد يكون عندها وعي وتبدأ الثورة منها

يمكن علشان لغاية دلوقت مستغربة ان الطبقة بتاعتي المتوسطة الليبرالية عملت فعلآ ثورة

يمكن علشان الثورة الحقيقية بدأت من هناك من عمال المحلة

واحنا الطبقة المتوسطة ندين لهم بكل الفضل

ولأن أحداث المحلة هي اللي جرأت الناس تشتغل بعد كدة

ما علينا أكتر نغمة فاقعة مرارتي الأيام دي نغمة مصر فوق الجميع

بصراحة أنا بالنسبالي المصري الانسان فوق الجميع

و الثورة دي اتعملت علشان المصريين مش علشان مصر

كل فرد فيهم على حدى مش علشان المجتمع ككل

انا عارفة ان فروق الألفاظ للمصرين ولا لمصر مش بتفرق مع ناس كتير

بس

كلام زي بلاش مظاهرات فئوية

انا مش عارفة ايه اللي منزل الناس الي بجلاليب دول البيئة معانا المظاهرة

هم العمال ليه مش شايفين غير مصلحتهم و مش شايفين مصلحة مصر

و يا جماعة استنوا

منرفزني

اذا كانت الثورة دي قامت علشان الحرية

فا الحرية معناها اعطاء الانسان فرصة انه يعبر عن مشاكله و مطالبه و يتظاهر

لاا من حق حد غيره انه يحدد شكل أو ميعاد التظاهر

اذا كانت قامت علشان العيش فلغاية ما القانون بتاع الحد الأدنى للأجور يتطبق لازم الناس تتظاهر

و اذا كانت علشان عدالة اجتماعية فلازم الناس تفضل تتظاهر لغاية ما الفروقات في المرتبات الخيالية بين الناس في المؤسسة الواحدة ما بالك بالمجتمع ككل تقل

واذا كانت المظاهرات علشان الفساد فلازم الناس تفضل تتظاهر لغاية ما كل معاوني النظام من رجال الحزب و الوزراء و رؤساء المؤسسات و المحافظين اللي سرقوا البلد نشوفهم خلف القضبان

واذا كانت المظاهرات معمولة علشان كرامة المصري المبعترة في وسط الدول

فلازم نفضل نتظاهر علشان نبني مؤسسة دبلوماسية محترمة و قوانين تحمي كرامة المصري جوة و برة بلده

لما المصري يحقق كل ده مصر فعلآ هتبقى فوق الجميع

مطالب العمال الفئوية في 6 أبريل .

مطالبهم في رفع الظلم عنهم و اعطاءهم فرصة لمستقبل أفضل ليهم و لأولادهم مطالبهم اللي امتدت للشارع و انتقلت من مطالب لرفع الأجور للمطالبة بإسقاط نظام الحكم لأنهم فهموا ان اسقاط الحكم هو السبيل الوحيد لتحقيق مطالبهم

العمال اللي طلعوا بمطالب شرعية لا كان عندهم ساعتها مثل ذي تونس ولا كان بتدعمهم أي فئة . العمال اللي كانوا جزء كبير من انجاح ثورة 25يناير لما أضربوا في آخر الأيام و ساعدوا في تحقيق مطالبنا

العمال و الفلاحين و طبقة الموظفين في مصر بيمثلوا نسبة اكبر بكتير من نسبة الطبقة المتوسطة العليا اللي مش محتاجة حاجة

هم دول الطبقة اللي بتدعمنا و مغطية الثورة و عندها أسباب قوية انها تثور

و هم عماد المجتمع و أساسه.

دي ناس فاهمة صح و عارفة هي بتعمل ايه و مؤمنة انه لو اتحستنت احوالهم مصر كلها هتتحسن

ناس انتماءها لمصر و للقمة عيشها لا عندها أيديولوجية ولا فكر بيضحوا بمصلحة بلدهم علشانه

الناس دي لو محاستش بعائد حقيقي من الثورة عمرها ما هتصدق اي شيء بنقوله

مش لازم أبدآ نخزل الناس دي لمجرد اننا عالم كسولة عايزين الثورة تخلص بسرة علشان نرجع ناكل و نشرب و نروح نصيف

عمر الثورات بيتحسب بالسنين مش بالأيام و بعدين

حتى من منطق مصر فوق الجميع ده. ايه يعني بهدلة انشالله قرن بحاله لرفعة شأن بلد عمرة بيتعد بألاف السنين

نوت: لسة في ناس محبوسين من أيام 6 أبريل لم يفرج عنهم لسبب محادش عارفه

عمال المصانع الحربية و هيئة قناة السويس عاملين اضرابات.

يا ريت ندعمهم علشان يدعمونا بعد كدة