أيها الإنسان الوسطي الكيوت أين ذهبت؟


لما كنت بحضر من فترة إجتماعات ليها علاقة بمبادرة مصرية للمراقبة على السجون كانت المنظمات كذا نوع في طريقة التعامل مع السلطة
نوع لا يتعامل تمامآ مع السلطة دائم الإنتقاد و في صف الضحية مهما كانت
السلطة بتخاف منه علشان مش بتعرف تضغط عليه... بيعرف يساعد المسجونين في قضايا فضح الممارسات القمعية ضدهم
لهجة بياناته دائمآ قوية ولا يقبل حل وسط مع السلطة طالما فيه إنتهاكات
النوع ده عادتآ السلطة نفسها مش بتهاجمه لكن بتسلط عليه ناس

النوع التاني كان برجماتي شوية معاندوش مانع يكون في حد أدنى من التنسيق مع الأمن في سبيل إن المنظمة تدخل للمساجين في السجن وتشوفهم أو تعرف تدخل أي مساعدات للسجناء
كان التيار التاني بيقدم مساعدات على الأرض أكبر من التيار الأول و كمان بيستغل راديكالية التيار الأول في تهديد ناعم للسلطة الأمنية ... الي هو قدمي يا سلطة الحد الأدنى الي بنطلب بيه بدل ما نسيب عليك دول ... التيار التاني قليل منهم الي بيعرف يستمر ...محتار ما بين إذاي يعرف يرضي طموحه في رفع الظلم و اذاي الأمن مايقفش عليه و يلغي إمتيازاته
غالبآ التيار التاني في الآخر بينتهي لحاجة من الإتنين يا يذهق و يبطل يشتغل من كتر طلبات الامن
أو شوية بشوية يتنازل... تبقى إحصائياته ضعيفة و بياناته ضد الإنتهاكات هابلة و يبتدي أنصار التيار الأول تنتقده جامد ويبتدي يفقد مصداقيته والأمن يستغله ولما مايبقاش عنده ورق ضغط الأمن بينفضله
طبعآ فيه أمثلة من التيار التاني دي بتشتغل لمدة سنين وده بيكون نتيجة إنه بيقدم خدمة جيدة و بقى عنده شبكة كبيرة من المنتفعين فبيثبت مصداقية على الأرض والأمن ماينفعش يهمشه
في بقى التيار الثالث الي غالبآ الأول مش بيتعامل معاه تمامآ... تيار شايف إن ليس في الإمكان أبدع مما كان... هو والأمن واحد... و ده أنواع: نوع مصدق السلطة ومصدق نفسه فاكر إنه بالمهادنة هيعرف يقدم خدمات جيدة للمسجونين  وانه لو إنتقد الأمن والسلطة هيحصل تغيير ممكن يجيب مصيبة تإذيه 
ونوع تاني أصلآ معمول علشان يحسن صورة السلطة في مصر و يتقال إن فيها منظمات مجتمع مدني أليفة وكدة
أنا بصراحة ماعرفش إيه لازمة التيار التالت بس يمكن الي مصدقين نفسهم بيحاولوا يقدموا خدمة بجد وبيبقى عندهم مهارة الممكن لتحقيق المستحيل

التقسيمة دي تشبه تقسيمتي للناس المهتمة بالشأن العام عمومآ
ناس ثورجية دايمآ شايفة إن الي إحنا فيه ده زفت ولو ماكوناش في الجنة فلازم نعترض لحاد ما نحقق الجنة و ناس محافظة شايفة إن الي إحنا فيه آخرنا و أحلى حاجة و أي تغيير أكيد هيبقى مصيبة وجحيم . و ناس إصلاحية بتحب تاخد خطوات للأمام وتحسن الوضع بس بتحسبها وممكن ترضى بحل وسط مؤقت و خطوة خطوة هنوصل للي عايزينه

المشكلة ان الأيام دي الناس متقسمين إتنين نص ثورة ثورة حتى الموت و نص عاملين أيدينتيفيكاشون وزي ذا أجريسور

سواء الأجريسور ده إخوان أو الدولة الأمنية الفلولية
 راح فين الأشخاص البيرجماتية النفعية ؟؟؟ محادش يعرف

الثوار الي لسة ثوار من كتر الضرب على الدماغ مباقوش يثقوا في حد بقوا ذي الكالت كدة ليهم أفكارهم وألفاظهم و طريقة 
حياتهم الخاصة ومن كتر ما عانوا مش قادرين يفهموا ان فيه حد تاني عادي ممكن يكون بيعاني و تعبان

الماحفظين الفلول هنعملهم إيه ربنا معاهم

بس الإصلاحيين بقى راحوا فين؟ مش عارفة
هو فيه نظرية أنا ألفتها بناء على مقولة سمعتها مرة من واحدة صاحبتي عن واحد صديقها قرر يبقى شرير
"الدنيا  إنت فيها يا شاكوش يامسمار ووأنا خلاص هبقى شاكوش"
واحد إختار يبقى أنتي سوشيال بكل إرادته.. هتعمله إيه!
أنا حاسة إن الناس الليبرالية الي كانت من زمان إصلاحية و ساعة الثورة ضمت على الراديكاليين الثوريين ساعة الزخم الثوري والحماسة... من كتر الصدمات الي أخدتها  إرتدت  إختارت تبقى شاكوش
شاكوش مع الإسلاميين لما مسكوا أو لو هيمسكوا و شاكوش مع الجبش والمحافظين
الي هو أنا جربت السكة الي ما بحبهاش وخدت على دماغي كتير.. أنا قررت أبقى اناني و يلعن الإنسانية الي عملت فينا كدة

رأي المتواضع إن أي مجتمع الفئة دي فيه قليلة وتقريبآ مختفية... مجتمع يقلق
المفروض نعمل إيه محادش عارف.. بس الي أعرفه إن لا الشخص الرومانسي الحالم هيعيش على الأرض ويقلب بريجماتي ولا الشخص المحافط هيبقى مقدام
الأمل كان في الي بين البنين والي بين البنين راح يا عيني عليه!

قانون التظاهر الإنجليزي وأشياء أخرى


إمبارح و بعد مناقشة كدة قررت أن أبحث في القوانين الدولية لتنظيم المظاهرات
قرأت سريعا تفسيرات للقانون الإنجليزي و السويدي  و الفرنسي

و كانت تلك هي ملاحظاتي: في البداية تعتقد أن القانون المصري هو النسخة المترجمة من القانون الإنجليزي أو الفرنسي

لكن مع التمعن و قراءة شرح القوانين "و انا غير خبيرة بالمرة"
 تلاحظ

في القانون الإنجليزي الإخطار للبوليس بيكون للمسيرات حتى لا تعطل حركة المرور أما المظاهرات الغير متحركة فلا يلزم إخطار السلطات و رغم ذلك يخطرالأشخاص السلطات حتى يأتي البوليس لحماية المظاهرة

الحالة الوحيدة الي القانون الإنجليزي بيمنع فيها مسيرة هي حالة الإخلال بالنظام العام 
مثلآ من فترة إتمنعت كل المسيرات في لندن لفترة أيام نظرآ  لنية  مجموعة إسمها المدافعين عن إنجلترا عمل مسيرات فيها شعارات عنصرية ومحرضة على العنف ضد المسلمين 
"كانوا عملوا مظاهرات قبل ذلك وحصل فيها عنف و عنف مضاد"

في القانون الإنجليزي من حق البوليس يطلب منك إنك تقدم طلب لمجلس المدينة بغلق شارع معين لمدة معينة ساعتها يخطروا المواطنين العاديين يمشوا من حتة تانية علشان مايتعطلوش

بالنسبة للمظاهرات في الملكية العامة كالحدائق مثلآ يجب إخطار مجلس المدينة أولآ قبل البوليس و ليس من حق مجلس المدينة رفض طلب التظاهر
أما بالنسبة للمظاهرات في الملكية الخاصة فمن حق مالكي المرافق رفض سير المظاهرات في حيز ممتلكانهم

الأماكن الوحيدة التي ينظم التظاهر أمامها و يتم وضع كردون أمان هي الأماكن التاريخية والمنشآت العلمية 
" في القانون المصري بقى ضم المنشآت العسكرية كمان"
المادة الرابعة عشرة تنص أنه ''يحدد وزير الداخلية بقرار منه بالتنسيق مع المحافظ المختص حرمًا آمنًا معينًا أمام المواقع الحيوية كالمقار والمنشآت الحكومية والعسكرية والأمنية الرقابية ومقار المحاكم والنيابات والمنشآت والمتاحف والأماكن الأثرية ويحظر على المشاركين غير المتظاهرين تجاوز نطاق الحرم المنصوص عليه في الفترة السابقة''

لا يوجد ما يسمى بتعطيل عجلة الإنتاج في أي قانون ما عدا المصري... تعطيل عجلة الأنتاج في معناه الفضفاض في المادة السابعة يعني أن الحق في الإضراب السلمي إتلغي رغم إن مصر أصلآ موقعة على مواثيق دولية تكفل حق الإضراب
كل الدول التي قرأت قوانينها تنص على حق العمال في الإضراب السلمي ما عدا فئات  معينة من ضمنها "ضباط البوليس في إنجلترا ليس من حقهم الإضراب"
المادة السابعة تحظر الإخلال بالأمن العام والنظام العام أو تعطيل الإنتاج أو الدعوة إليه أو تعطيل مصالح المواطنين أو تعريضهم للخطر والحيلولة دون والتأثير على المرافق العامة أو النقل أو تعطيل حركة المرور أو الاعتداء على الأرواح والممتلكات العامة والخاصة وتعريضها للخطر.

لا يوجد في أي قانون عدا المصري مادة تلزم منظمين المظاهرة إخطار السلطات بشعارات المظاهرة "ناقص يشغلوهم أمن"
المادة الثامنة للإخطار ''من ينظم يجب أن يخطر بذلك قسم الشرطة الذي يقع بدائرته الاجتماع العام أو الموكب أو التظاهرة وقبل بدئه بنحو ثلاثة أيام عمل على الأقل وبحد أقصى 15 يومًا وتقصر إلى 24 ساعة إذا كان الاجتماع انتخابيًا على أن يتم تسليم التخاطر باليد أو إنذار على يد محضر، ويجب أن يتضمن مكان الاجتماع العام وخط سير الموكب وميعاد بدء الاجتماع العام أو الموكب أو التظاهرة وموضوع الاجتماع أو الموكب أو التظاهرة والغرض منها والمطالب والشعارات التي يرفعها المشاركون في أي منها وأسماء الأفراد أو الجهة المنظمة للاجتماع العام أو المواكب أو التظاهرة وصفاتهم ومحل إقامتهم ووسائل الاتصال بهم''.

لا يوجد ما يسمى فض مظاهرات في القانون الإنجليزي "إلا في حالة الشغب طبعآ"... يوجد إحتواء للعنف وتفتيش للمشتبه بهم. القبض على مسببي العنف و أخيرآ اللجوء إلى عمل دائرة لإحتواء المشاغبين و تعطيلهم عن المغادرة... 
تؤخذ أوامر إحتواء المظاهرة من ضابط برتبة كبيرة على ما أعتقد موازي للواء في مصر
في القانون الإنجليزي العقاب على رفع شعارات مسيئة أو بها سب وقذف قابل للمناقشة ممكن تقع عليك غرامة و ممكن ببساطة تدافع عن حقك ولا تعاقب
أما المصري "والمادة الحادية عشر تنص أنه إذا صدر أي فعل يشكل جريمة يعاقب عليها القانون تقوم قوات الأمن بالزي الرسمي وبناء على أمر من القائد الميداني المختص بفض الاجتماع العام أو التظاهرة، ويجوز للقائد الميداني أن يطلب من المحكمة ندب من يراه لإثبات الحالة غير السلمية للاجتماع العام أو التظاهرة ويصدر القاضي أمره على وجه السرعة."


القانون الفرنسي يتيح الحق للمظاهرات أو المسيرات العفوية بعد أحداث جلل طالما المسيرات سلمية

الفروقات البسيطة في مظهرها و الجوهرية في شروحها بين القانون المصري و أي قانون آخر نابعة بالأساس من المبادئ التي سنت من أجلها هذي المبادئ

القانون أداه في يد سلطة يتبادلها أفراد. القانون والحقوق باقية والأشخاص تتبدل مواقعهم
القانون يسن من أجل اللحظة الراهنة والمستقبل... لا لكي يضمن إستمرار النظام الحالي و يسحق أي منافسين

وظيفة الشرطي هي حمايتك سواء كنت متظاهر أو تمر بجانب مظاهرة

الشرطي شخص محايد ينظر الى من يقوم بمظاهرة ضد الدولة مثله مثل من يقدس الدولة الإثنان لهم حقوق و عليهمم واجبات
حرية الفرد في الإعتراض و التظاهر حق أصيل تكفله الدولة و تحميه بأدواتها الممثلة في الشرطة والقضاء
الدولة كيان صديق وليس عدو يحميك ولا يحمي نفسه
الضابط مثله مثل الدكتور أو موظف الدولة يتلقى راتبه من ضرائبك ليخدمك كما ستخدمه أنت بشكل أو بآخر الكل يعرف وظيفته و حقوقه لا حاجة لأحد أن يمن عليك لأنه أدى 
واجبه
كل شخص يتحمل نتيجة إختياره لا ذنب لأحد أنك قررت أن تدخل حربية أو شرطة ثم تفاجئت بهول مسؤولياتك فقررت أن تجعل حياة الآخرين جحيم ثمنآ لإختيارك
مش عاجبك إستقيل من الشغلانة و إبعد عن قرفها يا أخي

أنا لا أسب مرضاي يوميآ و ألومهم على بختي المايل الذي حدفني في الشغلانة المهببة دي و أقولهم طول النهار والليل كان زماني مهندسة ولا ملحقة في أي سفارة بقبض فد كدة و بتفسح وعندي حياة!! ما ذنب أمهم ؟

أنا لا أهددهم يوميآ أني سوف أتخلى عن مسؤولياتي إذا لم يرضخوا لي
أنا أحوال أن أقوم بواجبي قدر المستطاع مهما كانت الإمكانيات

مللت من إنتظار الإستقرار حتى يأتي الرخاء
منذ ان وعيت على الدنيا والناس تصبر و تنتظر تصعر خدها للشرطة وللدولة الأمنية تشحت على الإستقرار... لا الإستقرار جاء ولا الرخاء جاء  و كل ما جناه الناس هو الإنتهاك اليومي لإنسانيتهم
الى متى؟

بعض المقالات


Amid ongoing Egyptian protests, UN chief urges rethinking anti-demonstrations law

قانون التظاهر الجديد و حاجات تانية

طبقآ لموقفي الي البلوج الي فات أنا كنت قررت أن لا أقرأ قانون التظاهر الجديد
و كمان علشان
كلمة إنه معمول مخصوص علشان مظاهرات الإخوان فقعتني
و بصفتي بقيت مؤمنة إن كل المجموعات السياسية لازم يكون عندها إستراتيجية تانية غير المظاهرات
و يفهموا إن المظاهرات دي وسيلة من ضمن مليون وسيلة و ليست غاية
و إني بقيت مفقوعة من دعاة الإستقرار الي حتى حق الحياة مستباح عندهم المهم الدنيا تهدأ

المهم بعد الضجة الي حصلت إمبارح قررت أقرأ القانون بس علشان أشوف الداخلية نفذته صح ولا لأ
قرأته بإعتقاد مبيت إن أكيد الثوار والداخلية قاموا بنفس الأعمال بتاعة كل مرة

المهم نص القانن أهو


و طبعآ أنا ماكونتش موجودة علشان أعرف هما إتدرجوا في الفض ولا لأ
أو الي إتظاهروا إستعملو إيه

بس أسئلة بسيطة
هل منصوص في القانون إن الأمن يقبض على الناس بلبس مدني؟
هل منصوص إن من حق الأمن مسك الأعضاء التناسلية للمتظاهرين أثناء الفض؟
هل منصوص على التحرش و السب؟
هل منصوص إنك تلف بالمقبوض عليهم في الشوارع في نص الليل و بعد كدة ترمي البنات في طريق صحراوي في بلد إنت مش مأمنها؟

هل معنى تطبيق القانون في مصر هو إنتهاك حقوق الإنسان؟؟

ماينفعش خالص تطبق قانونك ده و إنت محترم

أنا لا بقول دادي الثوار و سيبهم يعملوا الي هما عايزينه 

لكن ليه لازم أدادي الأمن؟؟
ليه لازم علشان أضمن إستقراري لازم الأمن يضمن حريته المطلقة في وضع أصابعه في مؤخرة أي واحد من الشعب وقت ما يعوز!!!


 لأ الأمن و الحل الغبي الأمني المنتهك لحقوق الإنسان هو السبب في كل المصايب

لأن الناس ما إتجننتش و أصبحت راديكالية لوحدها
الناس ثارت ضد إرث مهبب من دولة أمنية عمرها ما إنحازت غير للحرامية

و كل مرة الناس العادية تطاطي للأمن الأمن يخزوقهم و ينحاز للحرامية


يا عم طبق قانونك و سيبني أعترض عليه
لو أنا مش مهمة و عددي قليل سيبني أدن في مالطا
لو عطلت مصالح الناس فض مسيرتي

بس تتحرش بيا ليه؟؟!!!

اللامنتمية الكيتشية

في أوقات التخبط و الخوف يبحث الإنسان عن أقرب مبدآ الى قلبه و يتمسك به ثم يفسر به كل ما يحدث حوله 
تكون نظرته ضيقة و ذات بعد واحد... لا يوجد وقت ولا عقل لنقض الأمور من عده جهات

حتى ما تعتقد أنه صحيح ستتجنب كثيرآ التحدث عنه مع من يرفضون مبدئك 
ستتحدث فقط مع من هم مثلك... تستقي موقفك منهم و توجه كلامك إليهم
ربما تسمع لمن يخالفوك لكنك تسمع فقط للإنتقاد
ربما تسمع فقط لمن هم أكثر راديكالية في الموقف المضاد كي تتأكد تمامآ أنك على صواب

و كلما مر الوقت إقتربنا من المتشابهين في المبدأ الواحد الذي إخترنا التمسك به و بعدنا عن من كنا نظن أنهم مثلنا لكن إتضح أنهم في هذا المبدأ بالذات مختلفين نسبيآ عنا
يومآ بعد يوم تتسع الهوةو و تزداد نقاط الخلاف
نجد أنفسنا ندافع عن أشخاص كنا نكرهم ونشوه أشخاص كنا نحبهم 
يومآ بعد يوم ننساق بعيدآ و نتحول إلى جزء من مجموعة تريحنا
فالإنتماء أصل الأشياء

و نياله من كانت مجموعته هي الأكبر و الأضخم
أو تدعي أنها الأكثر تدينآ
أو التي تعتقد أنها الأكثر نظافة يد و طهرآ
أو التي تعتقد أنها الأذكى و الأعرف بالمستقبل 

أعتقد أني و الكثير من المصريين نمر بهذه الفترة من التخبط
و رغم أني أؤمن بأن الحد الفاصل بين ما أعتقده صواب و الخطأ دائمآ ذائب و يكاد أن يكون غير موجود
فلم تختلط عليّ الأمور في مصر بحيث لم أعد أعرف ما هو الموقف المفروض إتباعه كما هي الآن
حتى إني في الفترة الأخيرة آثرت الإبتعاد و دفن رأسي في الرمال لكن للأسف فشلت خطتي 

و من منطلق هذا الموقف المتخبط أحاول جاهدة أن أبني موقف لي لأستريح شخصيآ و ليس لأني شخص مهم يتبعه آلاف

لا أعرف من أين ياتي البشر باليقين بأنهم على صواب 
من أين يأتي اليقين أنك من الأخيار و ان من يختلف عنك هم الأشرار أو المغيبين أو العبط!
ربما أنا قليلة الفهم بالسياسة و عدم إتخاذي ينبع من جهلي

ربما أصبحت أعاني من الأمبيفيلانس اللذي يعاني منه مرضى الذهان

في البدئ واحد حمار

من خمس أمام كدة جالي شوية صعوبة في التنفس مع شوية دوخة و حاجات كدة

المهم نتيجة تاريخي مع الحساسية و إني أكلت أكل بيجيب حساسية قولت دي حساسية و هتروح لحالها
اليوم الأول ما عملتش حاجة التاني كترت في الأدوية المضادة للحساسية
اليوم التالت أخدت كورتيزون إستريحت شوية و قولت خلاص بقى
بس إبتديت أقلق و بطبيعة تخصصي  فكرت تكونش دلع تكونش حاجة نفسية؟ بس أنا الأيام دي على غير العادة مبسوطة و حياتي فلة يعني... فين يعني الي هكسبه من ورا القصة دي؟!!

المهم اليوم الرابع فضلت تعبانة قولت أروح لدكتور صدر يديني دواء قوي شوية

أنا و أنا عيانة بعمل حاجة من الإتنين يا بعالج نفسي و أضرب أي دواء يا بنسى إني دكتورة أساسآ

 روحت عيادة صدر في مستشفى كبيرة ... أهي مستشفى كويسة و أكيد العيادات فيها دكاترة بتفهم
" و دي أول غلطة أعملها الدكتور ذي العريس مش معنى إنه إبن ناس و ساكن في حتة كويسة إنه شخصيآ مش حمار"

 أول حاجة عملها سمع الشكوى و بعد كدة بص على الأشعة وشه إتاخد 
إيه ده أسمع صدرك إه ده أنا مش سامع الضغط
إيه ده روحي لبتاع الباطنة الي جنبي و بعد كدة طمنيني أنا قلقان
كان ناقص يقولي المفروض تكوني ميتة إنتي عايشة إذايّ

المهم أنا قولت إيه الدكتور المجنون ده و روحت لبتاع الباطنة الي جنبه

خير يا ستي فيه إيه؟ 
حكيتله و قولتله على بتاع الصدر " و دي تاني غلطة أعملها... عمرك ما تقول لدكتور رأي الدكتور الي قبله لأنه بياخد بيه عمياني من غير تفكير"
إبتدى يتخض
إيه ده؟
أعملي تحليل دم
أعملي رسم قلب أعملي سي تي
أعملي إكو

يا نهار أبيض في إيه يا دكتور أنا كويسة دي حساسية!!

أيوة يا بنتي بس مافيش حد كبير على الجلطة في الشريان الرئوي أو إلتهاب القلب
أو مشكلة في الشرايين
أنا سامع حاجة مش مطمناني على صدرك

أنا: WTF!!
أنا ماكنتش مصدقاه بس قلقت 
" و دي ثالث غلطة: صدق إحساسك ماتصدقش أي دكتور مهما كان كبير"

المهم صاحبتي ضغطت على و أنا بصراحة إستسلمت تمامآ
و جالي أفكار شبه "هو انا متأكدة إني معانديش حاجة خطيرة بس ممكن لو انا عيانة أموت بسرعة و نخلص.."
و قولت أكلم أي حد أرغي معاه أي حاجة!
أول حد جه على بالي كان هو
كلمته أسأله أعمل إيه أهو شخص كول و هيطمني
" و دي رابع غلطة .. ماتكلميش صاحبك الدكتور و هو في نبطشية لأنه مش هيعرف يجيلك يشوف في إيه فهيحب يطمنك بس بطريقة" تحسسك إنك بتستهبلي فهتحسي إنك بين شعورين يا رب أعيش و أنكد عليه أو أطلع عيانة علشان يتعلم يركز معايا بعد كدة"

حبيبي أنا بحبك بس إنت لا سمعت صدري ولا شوفت الإكس راي ف ماتفتيش!
بس أصله هيعمل إيه يا رغدة يعني!!
المهم قرفت من المستشفى و قولت أروح التخصصي بقى أعمل الدي دايمر و كفى المؤمنين شر القتال


و أنا في السكة صاحبتي الأنتيم كانت وشها جايب ألوان و هتلبس في كل العربيات من الخضة
أنا إبتديت أتنح و أتكلم في حاجات تانية و بتاع

"ملحوظة 1 الدينايل ده جميــــــــل"


روحت التخصصي حسيت إني في بيتنا كل الناس عارفاني أنا و صاحبتي و رغم قلة الإمكانيات الكل عايز يساعد
"الغلطة الخامسة مكان من الأول!! من خرج من داره إتقل مقداره"


  عملت تحليل الدي دايمر و أنا مستنية النتيجة صاحبتي قابلت دكتور قلب عارفنا حب يوجب فكشف عليا و إبتدئ يدلي بدلوه هو راخر "أعملي إكو أعملي سي تي طب أحجزك طب مش عارفة إيه"
حتى بتوع المخ و الأعصاب أصحابي عدوا في الإستقبال و إبتدوا يفتوا
" ملحوظة 2 ساعات مش بقدر أفرق بين المجاملة و حب المساعدة و الحشرية من غير سبب"

الدي دايمر طلع نبجاتيف الحمدلله

بصراحة أنا حسيت براحة رهيبة يااااااا لهوييييييييييييي 
الحمدلله
ماهو بالموناري إيمبولسم إيه و أفورة إيه يا رغدة بس دانتي عيلة هيستريونيك صحيح

حلفت لانا راجعة البيت و إشتريت الأدوية الي على مزاجي بس 
أخدتها إتحسنت شوية و نمت شوية

و صحيت كنت لسة تعبانة بس نسبيآ أحسن
سابعة الصبح صاحباتي بيتصلوا بي يالا يا رغدة قومي نعمل السي تي و الإكو
أنا وافقت بسرعة قولت أعملهم و أخلص بدل ما أقعد قلقانة و مش عارفة في إيه

" نصيحة الدينابل لا يفيد... روح إصرفلك قرشين و إعرف آخر الي عندك إيه و إستريح سريع سريع بدل القلق الفاضي"

ملحوظة على جنب "أنا بحب الدمرداش و التخصصي و الناس الي فيهم قوي قوي ما عدى بتوع الراديولوجي ""

" الغلطة السادسة ... لو  كنتي فاكرة إنك لو عملتي أشعات و تحاليل هيعالجوكي... هيهات يا ماما هو دواء واحد بيوصفوه كلهم بيحتوي على كورتيزون و غالبآ مش بينفع .. الأشعات دي للتشخيص و العلم و العلماء"

عملت الأشعات و طلع عندي " pulmonary congestion و bronchitis " 
حاجة عبيطة و قالولي إني بتحسن

إيه السبب يا مؤمن؟ ما حدش عرف شوية برد على حساسية على ألفلوينزا 
طيب فيه دواء زيادة؟ لأ خليكي ماشية على نفس الأدوية


طيب لازمته إيه الفيلم العربي ده؟؟؟
بابا: أديكي عملتي فحوصات إتطمنتي على نفسك  
ماما: محسودة يا حبيبتي

يالا أديني هريح في البيت يومين و ماما هتعملي أكل بحبه.....
يكونش  الأكل و الراحة دول السيكوندري جين والي كان عندي ده كونفيرجن (حالة نفسية)؟؟؟!!!

ولا هعرف
يالا سلامتي ألف سلامة!