المنظر:

ست مش قادرة تمشي معاها راجل غالبأ جوزها و ست شكلها شلق عمالة تزعق

مااااافييش دكتور هنا معانا ست مريضة

وراجل كدة مالوش لازمة

الدكتورة جت :

خير في ايه

من امبارح مش قادرة تمشي يا دكتورة اتشلت

حصل حاجة او مشكلة

جوزها : حاجة بسيطة يا دكتورة

الست الشلق: لأ يا دكتورة اصله ضربها في وسط الشارع ووقعها عالأرض

الدكتورة: طب كله يطلع برة ما عدى المريضة

خير يا ستي؟

الست بعياط

مافيش

بصي ما تقلقيش اي حاجة تقوليها ما حادش هيعرفها

الحكاية ابتدت لما كنت حامل من اربع شهور و شوفت جوزي مع جارتي في وضع مش كويس

متأكدة؟

بقولك شوفتهم يا دكتورة. المهم ساعتها سيبت البيت و اتخانقت معاه بس هو اعتذر و قال انه مش هيعمل كدة تاني المشكلة اني مش قادرة اسامحه و علاطول شاكة فيه و هو كل ما يحس اني شاكة يمد ايده عليا بس انا لسه بحبه و خايفة على ابني هنترمي في الشارع

هي كمان جاتلي بعد كدة و باست ايدي و اعتذرتلي وقالت انها غلطانة

ده حتى هي اللي جايباني دلوقتي مع جوزي المستشفى

.......................

منظر تاني

ست بارضه مش قادرة تمشي

خير يا ستي

تعبت يا دكتورة لا عارفة اخلص من حياتي ولا عارفة اعيش نضيفة

في ايه ؟

كل شوية جوزي يضربني و يفضحني و يقول للناس اني باردة ومش بحس و ممكن يخليني انام معاه بالعافية

انام معاه ازاي و هو كل شوية بيسربني من البيت علشان يجيب رجالة يناموا معاه على نفس السرير

انا بقالي سنتين مقربتش منه و عيالي عرفوا

أعمل ايه وانا ابني كل شوية يقوللي ولله لنا دابحه

طيب مش بتطلقي ليه؟

هو اللي بيدفع ايجار الشقة لو اطلقنا هيرميني انا والعيال و مش هيدفع حاجة وانا ماحيلتيش فلوس

"غالبآ ده السبب اللي خلى ابنها مايقتلوش لغاية دلوقتي. مش علشان انا متعصبة ضد المثليين خالص لكن اللي يغتصب مراته و يعرضها للعدوى نتيجة السلوك اللي بيمارسه و يكون بالأنانية انه يطرد عياله و مراته علشان رغباته لازم يتحاسب"

....................................

ست منقبة و جوزها داخلين عيادة

خير يا ستي مالك

جوزها بيرد : عمالة تعيط طول النهار يا دكتور

ليه يا ستي؟

جوزها تاني: انا عارف نسوان آخر زمن

يا استاذ من فضلك انا بكلمها

من فضلك اكشفي وشك و كلميني

جوزها: نعممممممممممممم لأ طبعآ

من فضلك اطلع برة انا عايز اكشف على المريضة و لو نظامي مش عاجب حضرتك روح لدكتور تاني

جوزها : لأ سمعنا ان حضرتك دكتور كويس

طلع برة جوزها وكشفت الست النقاب عن عين حواليها ازرق و شفاه وارمة

الست بصوت مخنوق: جوزي يا دكتور المحترم المصلي بيخوني مع ستات من الشارع ولما اواجه يضربني و يشتمني و مش عارفة اعمل ايه اسيبه و اشحت في الشارع ولا استحمل الزل والهوان؟

..............................

محادثة ماقدرتش اكملها

مش قادرة استحمله تعبت منه

على فكرة جوزك ده راجل طيب كتر خيره سايبك تشتغلي ومتنازل عن كتير من حقوقه الزوجية

............................

ساعات مش بابقى فاهمة الناس

ماتشتغل او ماتشتغلش تلبس تقلع

تربي كلاب تربي قرود تسرح على عربية كبدة انتوا مالكوا مين اداكوا الحق تتحكموا فيها مين عينكوا اوصيا عليها تتكلموا بلسانها تحموها او تحرروها

روحوا احموا نفسكوا ولا حرروها وللا صلحوا البلد الخربانة دي

والله الي شايفة نفسها فاقدة الأهلية وعايزة راجل يمشي وراها يمسح ريالتها هي حرة

اللي شايفة نفسها تقدر تعتمد على نفسها هي حرة

تسمع كلام جوزها يسمع كلامها يحوطوا لنفسهم قوانين يكسروها يستفلوا سوا محادش ليه دعوه

الحياة اصلآ قايمة علي الفروق الفردية بين الأشخاص ايش عرفك ان وضع فلان هيسري على علان

هي حرة ما لم تضر

بجد حاجة تفقع طول النهار الناس ستات أو رجالة و شيوخ في جوامع مافيش وراهم غير الكلام على الستات و اذاي نقومهم او نربيهم واذاي لو صلحنا الستات الدنيا هتنصلح

واللي يقولك الجنس الناعم والجنس الخشن

و ستيريو تايبس للصبح

دي لابسة كذا تبقى كذا شوف البنت عاملة ايه في نفسها

طيب قبل ماتحجبونا و تحبسونا في البيوت او تقلعونا الحجاب و تنادوا بحرتنا روحوا حرروا لقمة عيشكوا و حرروا نفسكوا من الذل

مش تلاقي الهمام من دول عمال يقولك و انه و يجب أن

و بعد كدة يجيب ورى و يقولك طاعة الحاكم واجبة ياخي ...........

أنا بقى فيمينيست مجنونة واللي هيكلمني عن بني جنسي بالخير أو البشر هنط في كرشه