ياه الواحد بقاله كتيرمكتبش حاجة
المهم
نظرآ لإكتتآبى الشديد من الى بيحصل فى لبنان وفلسطين ومصر
ده غير الدراسة و بعض المشاكل الأخرى
قررت آخد بريك او فاصل من كل شيء و أسافر
اخدت مام و رحنا الغردقة
قولت اكيد اهدىء من اسكندرية
دى مش أول مرة أروح الغردقة بس اول مرة اروح بالسوبرجيت

"الله يسامح بابا مارضاش نروح بعربة لوحدنا"

المهم ركبناه


سمعت كتير عن ترحيل الناس بس لما الواحد يشوف بعينه غير!!


تخيل تبقى بتعافر عشان تجيب النوم وخلاص بيبتدى ييجى


تلاقى صوت جاعورى فى الميكروفون

"كله يحضر البطاقة الشخصية "
عادى قولت يمكن فى مجرم هربان بيدوروا عليه مثلآ
المهم الاقيلك يا محترم واحد طول بعرض بارتفاع بطبنجة فى جمبه على غرار الأفلام العربى الأكشن الهابطة بيبص على بطايق الأوتوبيس كله


الشهادة لله الراجل مقربليش انا و ماما اصل شكلنا من المخلوقات الهارملس


فجأة لقيته لامم نص بطاقات الناس و كان فيهم بنات
و لاقيته بيقول للراجل الى جنبنا هات شنطتك وانزل
و لاقيت بنت بتنزل وراه منهاره عشان اخد بطاقتها


سمعت انه رجع البطقات للناس و نزل اربعة من السوبرجيت
جه فى بالى انه يمكن هربانين من الخدمة العسكرية و بعدين قولت مش ممكن
الراجل الى كان جنبنا شكله فى أواخر الأربعينات
قولت يمكن ده رئيس العصابة و الباقى الصبيان بتوعه


سألت عن السبب قالولى اصلهم مش معاهم تصريح دخول و هيترحلوا للقاهرة تانى
يا سلااااام اول مرة اشوف حد بيترحل فى بلده


مش يترحل دى كانوا بيقولوها على الناس الى بيهربوا من ليبيا لإيطاليا فى مراكب؟ و بعدين بيرجعوهم بلدهم مربوطين فى سلاسل بعد ما بيخدوا عليهم عهد بعدم دخول الأراضى الايطالية أو الاوروبية تانى؟


اااااااااااااااه الله يسامحه الى حكالى عن ظروف الترحيل من ذل و سجن و مهانة للا شيء غير ان الواحد حب ينتقل من محافظة لمحافظة تانية فى نفس البلد الى هي فى نهاية المطاف بلده و معاه جنسيتها
اكن مكتوب علينا نكون بلا قيمة حتى فى بلدنا
الى يشوف قد ايه هما حريصين على أمن المحافظات و يسمع عن الأراضى الى اتباعت بجنيه و نص للمتر ناحية الحدود بتاعت مصر يعنى جزء من الى بيسموه الامن القومى مش عارفة المفروض يعمل ايه
ياللا مش مهم
قضيت انا بقيت الرحلة بتخيل حصل للناس دي ايه
أصلى شخصية نكييدة!!
المهم روحت و نمت و ارتحت



الغردقة لمن لا يعرفها بلد عجيبة لو مشيت فيها شوية هتحس انك بتنتقل من مصيف اوروبى لوسط البلد للأرياف و كل ده فى شارع واحد


فيها كمية روس عجيبة مع شوية ألمان و جنسيات اخرى


زمان ماكنتش اعرف عن الروس غير مارات سافين ,انا كورنيكوفا, نيكولاي دافيدينكو و الاتحاد السوفييتى السابق
لما كنت فى المانيا و شوفت قد ايه بيتعاملوا وحش و سمعت من الناس قد ايه هما سياح معفنين و سألت عرفت انه ميمكن افقرمن كل دول شرق اوروبا


قولت اذاى كل الفقر ده و بيتحملوا مصاريف السفر لآخر الدنيا
و ليه بعد ماكانت الغردقة بلد للأوروبيين الأغنياء بس بقى بيجلها بتوع شرق اوروبا
و من هنا عرفت
الروسى بييجى هنا فول بورد فى انضف فندق اسبوع بمية دولار شاملين تذكرة السفر
الفندق نفسه المصرى بيقضى فيه الليلة بربعمائة جنيه و الروسى بيتعامل احسن من المصرى
لا تستعجب ولا تستغرب مرحبآ بك فى بلدك الأم مصر


أنا لا هتكلم عن كمية الروسيات الى بيتجوزوا صعايدة عشان يصرفوا عليهم عشان دى حرية شخصية
ولا كمية الانجليز و الألمانيات الى اتنصب عليهم فى ارقام خيالية ولا قصص الناس عن ان كل البازارات و شوية من فنادق الغردقة دى اتعملت من فلوس الأجانب الى اتنصب عليهم


انا شخصيآ شوفت واحدة ألمانية و واحدة انجليزية حصلهم كدة و كمان سمعت ان فى موقع لكل الستات الى اتنصب عليها حاطين صور الى نصبوا عليهم
بعض المواقع
http://www.dezy-house.narod.ru/Sharm/sharm.html
و سلملى على سمعة مصر
عمومآ اذا كان رب البيت بالدف ضارب فشيمة أهل البيت الرقص
و ذى مابيقولوا المصريين على دين الى ماسكهم


بس الأجانب بقوا انصح من المصريين و بيفاصلوا على قزازة المياه
آه والله كنت بشترى حاجة لاقيت واحدة بتسأل بكام قزازة المياه قالها اتنين جنيه زعقت و قالتلوا هما جنيه و نص مش دافعة غيرهم
ماقولتلكومش مش بلد طويلة عريضة جنب نهر النيل العظيم الدولة الي هي هبة النيل مش معاها فلوس يا حرام تمدلها مياه و بيجلها المياه فى عربيات نقل عشان تعبأ فى الخزانات و يستخدمها الناس
على رأى الست شيرين ماشريبش من نيلها !!


بس رغم كل ده إتفسحت و استجميت و نزلت المياه و شوفت الكورال ريفس و السمك الملون الرائع و ذى كل مرة اتمنيت انى افضل هناك و مارجعش القاهرة !!