فلسطينين لاجئين و مفاوض عليهم حتى النخاع
حتى يا ربى و هما بيقضوا واحدة من اسمى الشعائر لازم يطلع عينهم
بتخيل نفسي لو كنت بينهم بدل ما اكون بسبح فى الملكوت و بحمد ربي على الرحلة الروحية الممتعة بسب ميت ملة و شخص
يعنى بدل مايكون حج مبرور و ذنب مغفور بقى لعنة و قدر بيطارد شعب تقريبآ لم يستنشق طعم الراحة منذ ستة عقود
النهاردة ماتت أسيرة أقصد لاجئة أقصد حاجة فلسطينية فى عرض البحر و كله بنفسك يا حكومة
.......................................

النهاردة الذكرى السنوية الثانية لمجزرة اللاجئين السودانيين

أول مرة اعرف ان فيه تحقيق فتحته الحكومة عشان الى حصل
وكانت نتيجته تبرئة الشرطة من أى جرم و تحميل اللاجئين مسؤولية مقاومة السلطات و تخريب الممتلكات
دم 27 انسان بنتهم 11 طفل و8 سيدات راح هدر
يا ترى لو بشرتهم كانت أفتح و كانوا من دولة فوقينا مش تحتنا كان حصلهم كدة؟
.....................................

 حد فيكو يعرف الدكتورة سامية التمتامي؟
أنا نفسي ماكونتش أعرفها

الدكتورة سامية التمتامى هي رائدة علم الوراثة البشري
وكانت أول سيدة مصرية وعربية تحصل علي الدكتوراه في علم الوراثة من جامعة جوكز هوبكنز
واشرفت علي 50 رسالة ماجستير و45 رسالة دكتوراه ولها 70 بحثا علميا منشورا، وتوصلت من خلال البحث الي طريقة للاكتشاف المبكر للتخلف العقلي بأخذ عينة من اللثة.. ولها مؤلفات عالمية يتم طبعها دوريا
ولها أكثر من اكتشاف فى علم الوراثة مكتوب باسمها
لتفاصيل أكثر
اقرؤوا
http://www.lakii.com/vb/archive/index.php/t-122193.html


هي و كثير من الرائدات الأخريات أثبتو أن المرأة تضاهي الرجل و تفوقه لو أتتها الفرصة
في كل شيئ

.............................

انا أهلاوية اتعاطف مع الزمالك
من كذا يوم ر كانت ماما بتتفرج على حفلة لحكيم على التلفزيون الأرضي عشان تضحك على حد قولها
المهم لقيته في وسط الأغانى قعد يقول أهلي أآآآآآهلي آآآآهلي من غير سبب
نانسي برضو متصورة مع علم الأهلي
تشامر حزني كمان
حتى الراس الزملكاوي بيروح ماتشات الأهلى
و كل ده عشان يكسبوا ود الناس
حتى واحدة معرفة من بعيد أخوها لعيب فى الأهلي و خالتها صديقة شخصية لوزير الإتصالات وسطت أخوها عشان يشغلها و مواسطتش خالتها
بغض النظر عن كرهي للواسطة في حاجة غلط الرياضة و بالأحرى الأهلى واخدأكبر من حقه كدة
مافيش حد من حقه يبقى عنده النفوذ الرهيب ده ولا حتى الأهلى بجد ساعات بحس اني عايزة الزمالك يكسب عشان أحس ان دي كورة

انا لما الأهلي بيخسر بقعد اعيط بس لا الأهلى هو الى بيأكلني ولا بيعملي حاجة اكتر من متعة لحظية
ممكن الكلام ده في دماغي اللى مدمنة نظرية المؤامرة
بس انا خفت قوي لما لاقيت واحد مشجع اهلاوى متعصب في الليست عندى كاتب الي مالوش خير في الأهلى مالوش خير في مصر
........... لا تعليق

..........................................


ظابط ابن ناس

من كذا اسبوع انا و صاحبتي بنعدى الشارع لاقينالك خير الله ماجعلو خير عربية وقفتلنا عشان نعدى و لأنها حاجة نادرة و غريبة قولنا ايه دا مين ده
و قال ايه طلع ظابط و شرطة كمان
انا كنت عايزة آخد نمرة العربية و أبعتله بوكيه ورد على بيته
المفروض ان ده تصرف عادى بس في مجتمعنا الي أصبحت قلة الزوق هى الطبيعي فالزوق من ظابط حاجة عجيبة
.................


موسيقيين بييجوا فى ميعادهم
من اسبوع حضرت حفلة لفرقة إسكيندريللا في الساقية
الحفلة ميعادها 8
أعضاء الفرقة جهزوا 7:30
و قدمهم مدير الساقية الساعة 8
و ابتدوا 8:10
و كانت الكراسي منظمة و بأرقام و كان على كل كرسى ورقة مكتوب عليها برنامج الحفلة و كل أغنية مين الى مؤلفها و مين الى لحنها
قد ماستمتعت بروعة الحفلة و جوها الساحر و الألحان و صوت الفرقة الرائع استمتعت أيضآ بالتنظيم الرائع الذي قلما تجده فى أى حفلة
خصوصآ ان قبلها رحت حفلة بلاك تيما و كان فى مشاكل فى التنظيم
تحس الحاجة الكاملة كاملة من كله
..............................


عيلة غريبة
معروف فى مجتمعنا العربي ان دائمآ الرجل يكره خروج زوجته للعمل و بيحب التتحكم في مصيرها
الا عيلتنا قريبتي حبت تشتغل قام جوزها الى هو قريبى برضه قالها انا لا من حقى اعترض أو أوافق ده حقك و اختيارك
قامت مامتها قالتلها لو اشتغلتى مش هعرفك و أبوها تضامن مع مراته أما حماتها الى هى اخت بابابها قالتلها براحتك يا حبيبتى وأهلآ بيكى في بيتى

يبقى الموقف واحدة عايزة تشتغل و جوزها موافق وأهلها معترضين غريبة !!
..........................

عمركوا شوقتوا كلية بتبتدى التلات و قبل أجازة نص السنة بإسبوعين؟
كليتنا المصونة هنبتدى يوم التلات 1-1 و الاسبوع الى بعده السبت أجازة و الاتنين الكريستماس و الأربع راس السنة الهجرية
يعنى كل الى هناخده قبل نص السنة هيكون 8 أيام
ده غير ان نتيجة التأجيل لسة ماظهرتش
بذمتكو حبك ال8 أيام دول
من غيرهم الدنيا هتقف
كلية غريبة!
بس احلى حاجة اتعملت السنادى بعد الامتحانات الزفت ان الدفعة بقت ايد واحدة و عملنا جروب عالفيس بوك اسمه مش رايحين يوم التلات مش بمزاجهم
و فعلآ محادش رايح
دفعتنا السلبية طلعلها صوووووووووووووووووووووت
.................