بقالي كتير ماكتبتش حاجة على البلوج ولا كنت بدخل حتى اونلاين كتير

الحقيقة كان عندي مواضيع كتير عايزة أتكلم فيها ذي

الإكتآب الرهيب الي عندي

وعكة جدو الصحية ربنا يتمم شفاه على خير

أولاد رؤساء الأقسام عندنا الي فجأة أصبحوا نوابغ و جابوا الدرجات شبه النهائية في مواد أباءهم

خطتي لإغتيال وزير المالية رميآ بالقباقيب

كلمة عيسى حياتو أفريكيا لن تشنحني لأحد

"اللى هما الأندية الأروبية اللي دعمته ضد بلاتر في الإتخبات الي فاتت"

تمنياتي للمنتخب المصري انهم يعدوا الكاميرون

"دلوقتي ممكن أتمنى انهم يدخلوا دور التمانية :] "

حفلة مرسيل خليفة في القاهرة اللغز الذي لم يكتشفه أحد

الشوارع الغريبة و الجو الأغرب و حاجات كدة

بس لاقيت موضوع أهم قديم جديد غزة!!

مهما وصفت مش هقدر أعبر عن حزني و استيائي و قرفي الشديد من العجزالي احنا فيه

ان بني آدمين عايشين على حدودنا حياة غير آدمية بالمرة من غير لا كهربا ولا وقود ولا أكل ولا أي شيئ واحنا عاجزين عن دعمهم حتى بالكلام ولسه سايبين الحكومة تبعت لإسرائيل غاز و تتبادل معاهم سلع

بجد صدق مظفر النواب لما قال ما أوسخنا

كل واحد فينا منشغل في صراعات بالية مالهاش لازمة و هما هناك بيموتوا من البرد

النهاردة حاولت أعطي مثل واحد لنفسي في الجو ده جدي لايمكن كان هيعيش من غير دفاية مابالك هما الجو عندهم أسوأ بكتير

بلاش العجائز الي اد جدي الأطفال الرضع الي في الحضانات المرضى في المستشفيات

اليتاما الي قتل الاحتلال كل عوائلهم

بلاش دول خالص

الناس العادية اللي ذينا

مرة واحد من غزة مقتدرقالي احنا عندنا المال بس ماعندناش السلع اللي نشتريها

لا عندنا أكل ولا شرب ولا دوا ولا مية ولا أي شيئ

كل ده واحنا ساكتين

ناس كل شغلانتها كيف تغض البصر و كيف ترتدي الذي يقيك من النار

وناس متدروشة فاكرة ان لو راح او راحت لوحادة لابسة لبس مش عاجبهم و نهروها عن افعالها الشنعاء عملوا عمل جليل دخلوا بيه الجنة

وناس طول النهار عمالة تخطب عن حاجات وللت وعمرها ما هترجع

عمري ماسمعت حد من كل الآمرين بالمعروف ملائكة البشر بيعطي مواعظ في كيفية محاربة الرشوة أو الفساد أو كيفية مساعدة الناس أو حتى ادانة لما يحدث في غزة و حث على مساعدتهم

ناس تانية عمالين يحاربوا بعض في حروب مش بتاعتهم و خلصت من زمان

و اللي يقولك وانا مالي يا عم ماهما اللي باعوا أراضيهم

من معلوماتي السطحية الي كانوا بيملكوا الأراضي في فلسطين كانوا عثمانيين أو تبع وقف الكنيسة أو بعض أغنياء فلسطين الي كانوا عاملين ذى البشوات أيام زمان

أما بقية الشعب الفقير الغلبان كانوا ذي جدودنا فلاحين بيزرعوا الأرض مكانش عنهم حاجة يبيعوها

حتى لو حد فيهم باع قيرات أو قيراتين فا مين فيكوا مش هيسيب ويبيع لما يلاقي حياته في خطر

ناس تانية تقولك لعلمك الفلسطينية دول شعب غدار أنا عارفاهم

يااا سلاااااااام ده على أساس ان احنا شعب ذي الفل

مين فينا اعتقد ان حد صاحبه و خانه؟

محادش فينا ذاق تخلي بعض أبناء بلده عنه في الغربة؟

مش احنا المصريين الي بنسب بعض طول النهار بسبب المحسوبية و الكسل و كل العبر اللي فينا؟

ده مايمنعش ان فينا نمازج مشرفة و بتساعد فعلآ

ذينا ذي الفلسطينيين ذي كل البشر فينا السيئ والكويس

وبعدين حتى لو كانوا ناس باردة و قاسية تخيل نفسك كل يوم بتحضر عزاء لحد من أصحابك أو قرايبك أو أي شخص حبيته

تخيل لو ده مستمر لمدة خمسين سنة و ده العادة أبسط رد فعل نفسي هيبقى عندك هو جمود المشاعر و الصلابة

و ييجي حد تاني يقوللي احنا حاربنا خمس حروب قبل كده

يا شيخ اتلهي آل يعني حد فينا حضر الحروب ولا كانت فلسطين هي السبب في حروبنا ولا في حد دلوقتي طلب مننا نحارب أساسآ بلا نيلة

تيجي دماغ تانية تقولك احنى بينا و بينهم اتفاقية سلام

يعني لو كان فيه واحد كل يوم بيتحرش بيك أو بمراتك و بعدين رنيته علقة و الجيران اتدخلوا و عملتوا اتفاقية صلح وهو شغال يغتصب أختك أو جارتك في الغرفة التانية هتفضل برده تحترم اتفاقة الصلح

دا انت تبقى ولامؤاخذة.....

طيب و بعدين هنفضل سلبيين هانسيبهم يموتوا

هنام اذاي بليل ؟

ذنبهم في رقبتنا

دلوقتي هيجيلك واحد غريب أول حرف من أسمه (ح) حمار يعني و يقولك والله أنا طالبت كتائب القسام انهم يوقفوا ضرب الصواريخ لأنها بتطيير الحمام (بتاع السلام يعني) وبتقصف كل أغصان الزيتون

ماقدرش أقولك غير كلمة واحدة

كما تدين تدان يا كابتين !!



موضوع عجبني ذو صلة

رحله صيد