لسة شايفة فيديو الجنود

ايوة أنا شخصية بحب أشوف الأخبار بايتة و أساسآ مباقتش أتابع حاجة

يا لهوي على الذل!!
الحقنا يا ريس مش قادرين نستحمل التعذيب
جملة صعبة قوي منتهى الذل


من كذا سنة كانت كل معلوماتي عن سينا هي انها منطقة فيها دهب ونويبع الحلوين وشرم الشيخ المبالغ فيها وان سكانها ناس طيبة دايس عليهم القطر زي كل الشعب المصري الفرق انه عندهم موارد كتير قوي ممكن يغتنوا بيها بس محادش بيعبرهم

كنت بعذر تعاونهم مع الفلسطينيين وتهريبهم للسلع والبشر عن طريق المعابر... في ؟النهاية الفلسطينية اخواتهم! فيها ايه لما يساعدوهم و ياخدوا فلوس

بعدها بشوية ابتديت أسمع عن المساحات المهولة اللي مزروعة مخدرات ومحادش 
عارف يسيطر عليها... قولت لنفسي مش مشكلة ما الصعيد كله كدة

بعد كدة ابتديت أسمع عن الجهاديين والتكفيريين وانتشارهم وانتشار سلاحهم ...  قولت عادي ماهو أكيد أي منطقة ملاصقة لعدو الدولة والدين .. أكتر متشددين في الدولة والدين لازم يتواجدوا على الحدود

كنت بسمع تراطيش كلام عن عصابات التهريب اللي بتهرب اللاجئين على إسرائيل
 وكلام غير مفهوم بالمرة... و كل شوية كان يجيلنا حالة مضروبة بالرصاص في رجلها وهي على حدود رفح وداخلة العمليات... تيجي تكلم سفارتها علشان يساعدوها يقولولك دي لاجئة مالهاش صاحب
ما علينا



لغاية ما الشهور اللي فاتت ابتديت أفهم مشكلة التهريب في سينا
عصابات تهريب بشر ساعات بياخدوا من اللاجئين فلوس مستغلين حالتهم الصعبة في مصر وبيوعدوهم بمستقبل أفضل في اسرائيل في مقابل مبلغ مالي مش كبير ولا قليل
اللاجئين لا حول لهم ولا قوة 
ياخدوا اللاجئ ويرموه على الحدود وهو وحظه يا يتضرب في مصر ويموت يا يتضرب ويترحل على بلده والنظام يموته يا يروح اسرائيل يتعامل معاملة الكلاب ويتحددله نسله غصب عنه بس على الأقل عياله هيبقى ليهم تأمين صحي

العصابات اللي بتهرب دي العصابات الطيبة
يتباع عبد
يتباع حتت علشان زرع الأعضاء
تتباع وتشتغل سكس ووركر 
يغتصبوها لغاية ما يشوفولها صرفة
آآه والله زي ما بقولك كدة

!!!أهل اللاجئ اللي ماحيلتهمش اللضى

أنا مش هتكلم على أنواع التعذيب أنا هسيب خيالك المريض يصورلك عصابة بتبيع البني آدم حتت ممكن تعذبه اذاي علشان تاخد فلوس

المهم بعد ما أهله يبعتوا الفلوس العصابة بتاخد الفلوس وتبيعه لقبيلة / عصابة تانية وتبتدي العملية من أول وجديد
يا بيتقطع حتت يا بيتساب يموت يا بالصدفة رئيس القبيلة يعدي على خيمة التعذيب فا يقوم يسمع صويت فا يصعب عليه الناس يقوم معاقب الناس اللي عملوا كدة و باعت اللاجئين على القاهرة 
يقوم ايه يا مؤمن يجيلهم تهديدات كل شوية من الخاطفين

كل ده بقى على مسمع و مرأى من الجيش والشرطة والمخابرات و أي حد معدي في المحروسة مصر
آآه نسيت أقولك ان الحكومة لما بتقبض على لاجئ بتقعد تعذبه في السجن علشان يعترف على البدو اللي هي مش عارفة تجيبهم
يالله هي جت عليهم!

المهم يعني بالصلاة على النبي كدة سينا دي
فقر تلاقي مرض تلاقي فساد تلاقي دعارة تلاقي ارهاب و ترهيب وتهريب و تجارة البشر بالجملة أو قطاعي برضه تلاقي

الخلاصة الجنود الغلابة اللي هناك بيتعذبوا أسوأ تعذيب
تعذيب لايمكن حد يتصوروا ... مع احتمالية بسيطة وجود راجل طيب ممكن يعطف عليهم ويشبشب للي بيعذبوهم

الناس اللي في سينا مش معترفيين بيكم وكافرين بالدولة وقوانين البشر من زمان
الناس اللي خايفة سينا تضيع من مصر هييييهييئ ضحكة رقيعة!! ومين يا أمور قالك انها كانت جزء من مصر أساسآ

آخر مصر سينا كانت لينا كان في 1948 و شكرآ!


ملحوظة على الماشي.... اللينكات والفيديوهات اللي أنا حطاها حنينة جدأ عن الواقع