كتير بسمع كلمة المسيحيين أخذه أكتر من حقهم الأيام دي

كتير بسمع إنهم فاقوا علينا طلع لهم صوت

على أساس إنهم فراخ يعني؟

من عطاك الحق تقرر هما ياخدو إيه و مياخدوش إيه
أنت مين أصلا؟

مجرد مواطن مصري زيك زي أي بهائي مسيحي يهودي كافر مصري

البلد دي زي ما أهلك تعبو ليها أهله هو كمآن تعبو ليها

زي ما حارب أهلك عشانها هما كمان أهلهم حاربوا
بياكل و يشربو زيك بيدخلو الحمام زيك
ممكن فيهم ناس بيشتغلو أحسن منك و اعطو لبلادهم أكتر بكتير منك
كفاية ظلم بقى لمجرد إنك حاسس إنك أحسن
أحسن عند ربك فوق مش تحت هنا
تحت في الدنيا زيك زي أي حد و أقل لو كنت عنصري

كفاية بقى غباوة

غباوة شعب غباوة حكومة

العدو واحد فقر و جاهل و مرض سرح فينا لغاية ما قتلونا

حكومة محسسه المسيحي بالاضطهاد و محسسه المسلم إنها بيتدادي المسيحيين و هي في الحقيقة مابتعملش حاجة غير الغباوة

فيها إيه لو كان حادث فرشوط ده يبقى جريمة جنائية
هي البيدوفيليا ليها دين؟
ماكنتش أعرف؟

إيش حال م الجارايد مليانه أحداث
إشي عم وشي خال و إشي جار اغتصاب طفله

لكن إزاي لازم نخبي الخبر خوفا من الفتنة الطائفية أهو طلع العفريت

سنين مل جاهل ول فقر والتمسك بقشة الدين سنين من الخطب الرنانة
لو صاحبك مسيحي متقولش كل سنه وإنت طيب
البنات المسيحيين بيلبس ضيق في رمضان عشان يغرو الولاد المسلمين
الولاد المسلمين بيضحكوا على البنات المسيحية ويتزوجوهم
البابا بيلبس اسود حداد على ضياع مصر من المسيحيين

قوانين غبية
راجل يقلب مسلم يقلبولو عياله كلهم مسلمين غصب عنهم

واحد يقلب مسلم يغير رأيه مايعرفش
و يقولك لو المسيحيين مسكو البلد هيعملوا في المسلمين كدة


خوف من بعض و قلق دائم و كره و حقد كل ده ليه
عشان إيه؟

إحنا شعب عنصري بكل طوائفه

كلنا مصريين عنصريين
غلبنا اليهود غلبنا هتلر

مش بس مسلمين و مسيحيين بنكره بعض لا

بنكره الشيعة بنكره العرب بنكره أمريكا
إحنا بنكره السود بنكره الستات بنكره أي حد مختلف عننا

حزب الله و حماس عاملين مؤامرة علينا
شريان الحياة مؤامرة إيرانية أمريكية صهيونية إمبريالية إسلامية جزائرية قطرية سوريا تركيه فرنسية علينا

العرب بيكرهونا عشان إحنا أحسن هما عبيد إحسانا

مش بس العالم الخارجي لا

حتى جوة البلد
الغني بيكره الفقير و بيقول عليه جربان
الفقير بيكره الغني و بيقول عليه حرامي
أي حد معه سلطه يضطهد أي حد أصغر لمجرد إنو شايف نفسه صح
حتى في الشغل ماتسمعش من أي حد غير كلمة واحدة
أنا كل إلي في الشغل بيحاربني و بيكرهني
حالة من الكره العام

إحنا مش شعب كويس و مثلنا مثل أي شعب و لو لم تحل المشاكل

هتظهر أول فرصه هناكل في بعض

تطلع الحكومة تقولك مفيش مشكلة
إحنا اخوات الإسلام دين تسمح والمسيحية دين كل المسلمين بيحتيرمووه و فطار ثانوي و كلنا بنحبك يا عدرا

وييجي كل واحد من الطائفتين يمسك ودن اخواته و يقول تسامح إيه إلي فلإسلام ده دين كل دم
مسيحية إيه إلي بنحترمها د كلها تخاريف
ليه الكذب و النفاق
فيها إيه يعني لو كل واحد قال لل تاني أيوة أنا مش شايف إن دينك صح بس أنت إنسان زيي زيك و بحبك عشان كدة

فيها إيه لو كان فيه مساحة من حرية النقد ل كل شيء و أي شيء فيها إيه لو بطلنا نتشدق بإسم الدين عشان نعمل منظر أدام ربنا

نداء لكل مسيحي إصرخ قول أنت متديق من إيه إتكلم بحرية قول في وش الناس أنا مضطهد لو إنت حاسس بكده فعلا

كفاية بقى دير لهم الخد الأيسر
كفاية دفن للراس في الرمل

ليه الانعزال ؟
ليه الخوف ؟
هيحصل إيه أكتر من إلي بيحصل ؟

يا مسيحي أنت مواطن مصري ليك نفس الحقوق ول واجبات من غير لا زيادة ولا نقصان

لا حد المفروض يطبطب ولا يضطهدك
كتمان المشاعر و دفن المشاكل و الانكماش مش بيعمل غير حاجة واحدة مزيد من الكره


أما كل من نصاب نفسه إلاه و حاكم كل من فاكر نفسه صح من أي دين أو طائفة كانت

فاكرين إيه ؟
هاتروحوو فين في الأخرى؟
الجنة؟
إيش عرفكم؟

ساعات بدعي واقول يا رب متبقاش غير الدنيا للناس دي عشان كل إلي فاكر نفسه صح يموت مايلاقيش حاجه و ياخد بومبا !!!



أملي الوحيد في الناس الطيبة الغلبانة إلي بيحبوا بعض لمجرد الحب إلي بيعماملو بعض بحب و خلاص
لا عشان حد قال كدة ولا أمرهم بكدا عشان فطرتهم السليمة من غير التفكير في أي مقابل
ناس بسمع عنهم بس بطلت أشوفهم


thank you google ta3reeb for making Arabic writing easier to me
3la amal enno ashtery arabic keyboard soon!!