يااه بقالي كتير ماكتبتش حاجة
من مدة قرأت بوست عن الحماس للكتابة فى البلوج و اذاي بيقل من بوستين فى اليوم لبوست كل اسبوع لبوست كل فين و فين

المهم الأيام الي فاتت كنت في حالة بيات شتوي


لا كنت باشوف حاجة ولا بسمع حاجة


حتى الأخبار اللي كانت بترن في دماغي كنت باسد ودني عشان ماسمعش



فلاحين بتتضرب


بنزين بيغلى


و مستشفيات مافيهاش مولدات


و دكاترة بتتشتم و مش ذنبها



كلها أخبار سديت ودني عشان ماسمعهاش


.........................
العادي:
طبعآ لأننا نختلف عن الآخرون و اننا أكبر طلبة مش ساقطين في الجمهورية
كليتنا بتتميز بالدراسة و الحضور في الصيف
ولأن درجة الحرارة في العباسية تزيد بنسبة خمس لعشر درجات عن أي منطقة أخرى
ولأن السكاشن في الكلية بناخدعا في عز الحر و الشمس
وجب وجود تاكييف في القاعات الصغيرة
ولأننا في مصر التاكييف بايظ
المهم من أول راوند الجراحة واحنا بنقعد حوالي من مية لمية و خمسين في غرفة تلاتة في ستة متر مغلقة باحكام
طبعآ انا شوفت المنظر قولت يتحرقوا دول درجات انا مش هاروح
ما علينا العيال اتخنقوا و كتبنا شكوى و بعتناها لرئيس القسم
و نقلونا لغرفة على الشارع بها مروحة
يومين و لاقيناهم بيقولوا الغرفة جاهزة
دخلنا الغرفة لاقيناهم بيضوها بينك فاتح
"لأ مصالحوش التكييف"


..............................................


أنا متغاظة من اعلانات مؤتمر الصحة و السكان جدآ حاجة تفقع بجد
يعني لما يكون عندنا أعلى نسبة من الأمية
و معظم اللى بيخلفوا كتير أصلآ لا بيقروا ولا حتى بيروحوا المناطق اللي متعلق فيها الاعلانات
و حتى لوراحوا
انا شخصيآ لما شوفتها من بعيد من غير ماقرا افتكرتها اعلانات موبايل
يعني الاعلانات دي موجهة لمين ؟
ولا هي ذي بقية الحاجات اللي فى البلد مجرد قشرة بيضة مغطية سواد
غريبة جدآ البلد دي
في مستشفاتنا مباني رخام على اعلى مستوى لكن لا في اجهزة ولا في فلوس مع الدكاترة
شوارع مليانة اعلانات لتحديد النسل و المحافظة على نضافة البلد و اعلانات عن مدن جديدة
جرايد مليانة فرص عمل
في بلد نصها مابيعرفش يقرأ و مافيهاش نقطة مية نضيفة و نصها قاعد على القهاوي مش لاقي ياكل واللي زاد و غطى انهم بقوا مهددين بالطرد سواء من بيوتهم أو من مزارعهم
أو من اي اصل ليهم ممكن يعتمدوا عليه
...............
شوفت على قناة العربية امبارح تقرير عن ارتفاع نسبة الميليونيرات في العالم
و قالوا ان اكتر منطقة شهدت ارتفاع هي منطقة الشرق الأوسط وكانت الخريطة بتشير لمصر
ثم اوروبا الشرقية ثم أمريكا اللاتينية
أما عن اوروبا الغربية و أمريكا فكان ارتفاع نسبة الميليونيرات بطيئ
و عزوا ذلك لارتفاع أسعار البترول و النمو البطيئ الذي تشهده المنطقتين (أوروبا و أميركا)
لكن لو بصينا على البلاد دي هنلاقي
مصر و الشرق الأوسط:
أكبر نسبة فساد و كبت للحريات و تدخل لرجال الأعمال في السياسة و تقلدهم مناصب قيادية وأوسع هوة بين الفقراء والأغنياء
أوروبا الشرقية :
كانت ماتتخيرش عن مصر بس بدأ فيها حراك سياسي و اجتماعي و اقتصادي صحيح على استحياء بس كمان في منهم بلاد انضمت
للاتحاد الأوروبي
أمريكا اللاتينية :
بيحصل فيها تبادل للسلطة و حراك سياسى و اقتصادي
و الى حد بعيد الحريات عندهم أعلى من عندنا
أمريكا و اوروبا:
بغض النظر عن الظلم الواقع علينا نتيجة لسياساتهم تجاهنا لكن عنده حريات صحيح قلت لكن لازال المسؤولون يعملون لمصلحة بلدهم وليس للمصلحة الشخصية
...............
لو افترضنا ان ان فيه كتلة هلامية أساسها الأبيض و الأسود و في النص الرمادي بينهم
عندنا
أقوي طبقة هية اللى على الوش سواء الاسود القاتم او الأبيض الناصع
أما الرمادي هو الحلقة الأضعف
الأسود بيحاول يطغى و يخلي كل الطبقات لونه
أما الأبيض فهو أناني بيشفط أي بياض عشان يبقى ناصع أكتر
فكانت النتيجة ان الرمادي عمال يقلب اسود
لغاية ما بقى كل الطبقات سودة و على الوش طبقة بيضة ناصعة قوي و مخبية على كمية السواد اللي تحتها
لكن الطبقة البيضة انانية هتنكمش على نفسها تنكمش على نفسها لغاية ماتتقطع و يبان الاسود اللي تحتها و بعد كدة تغرق في بحر من السواد
كفاية تخريف
............................
ميكروباس اوف ذا داي

أول مالبنزين غلي قررت اركب واحد لغاية الكلية

الأجرة جنيه و ربع


تلاتة عمال ركبوا من ضمنعم واحد عجوز كدة

ادوا للصبي خمسة جنيه رجعلهم اتنين جنيه


العامل العجوز: انا باركب بنص جنيه
الصبي: الأجرة لغاية هناك جنيه
العجوز : حرام عليكوا انا مش بادفع غير نص
الصبي: مش عاجبك انزل
السواق يتدخل: خلاص ماتزعلش الراجل يدفع اللى هو عايزه
ها مرضي يا عم الجاج؟
العجوز: ربنا يكرمك يابني
.......................