بقالهم شهر كدة بيتكلموا عن اضراب يوم 6 أبريل


الحقيقة في الأول نفضت للخبر بس شكل العملية بجد


بابا قاللي كلمة


النظام نجح انه يقسمنا و يخللي كل طبقة تتظاهر عشان مطالب خاصة بحتة و فرقنا




مع ان في الأساس




الهم واحد و الجوع واحد


و المرتبات مبتأكلش حد


و الظلم عالكل و الناس ذهقت و كرهت عيشتها و كلنا زي بعض




دكتور مهندس سباك استاذ جامعة ظابط نضيف زبال


كلنا ذي بعض مش لاقيين ناكل






لا بنطالب لا بحرية ولا حقوق انسان ولا بنتظاهر ضد التعذيب




لأ بنطلب أقل حق ممكن يطلبه كائن عايش عالبسيطة




حق الأكل






لو خايف تضرب حقك مانت اتربيت على الخوف




بس على الأقل خد أجازة عارضة

ماتروحش أو ماتروحيش كليتك عادي بتحصل




بلاش ده كله ماتشتريش




حاول تستغنى عن الشراء ليوم واحد بس


يوم واحد بس ماتشتريش أى حاجة ولا عود كبريت حتى




يوم واحد تحس باحساس انسان مات في طابور العيش أبو خمس قروش عشان مش قادر يشتري أبو جنيه




يوم واحد تقول لأ لقزازة الزيت اللي بعشرة جنيه


و كيلو الطماطم اللي بأربعة جنيه


و علبة القول اللي بتلاتة جنيه


و كيلو الفراخ اللي بعشرين جنيه


و كيلو اللحمة اللي بخمسين جنيه


لإنسان مرتبه هو و عيلته ميتين جنيه




لأ للتجويع


لأ للاستعباد


لأ للنهب




كفاية تعبنا


كفاية حسبنه عالظالم


أعملوا حاجة يمكن دعواتكوا تتنفذ


و شوفوا






يمكن




جايز




احتمال




تحصل حاجة




!!