تررن تررن
"ألو"
"انت و احمد المفروض تحمدوا ربنا "
"ايه فى ايه يا خلتو "
"طب هتاخد السنادى من 99% "
" الله يلعن طب على الى عايز يدخلها كفايةةةةةةةةةةةةة "
" يا بنتى احمدى ربك و حبى كليتك هى الناس لاقية "
طبعآ الحمد لله على كل شيء و كل حاجة
بس احبها على ايه ؟
على صناديق الرنجة الخشب بتاعت الميتيين المتقطعين فى المشرحة
وللا على مدرج سنة أولى الى لا عمره ستر من مطرة و لا شمس ابو ستاير مقطعة من أيام الاحتلال الفرنسى الى كل وظيقتها لم التراب ده حتى الحشرات بتقرف تدخل المدرج
و لا معامل الهيستولوجى و البيولوجى الى أجدد جهاز فيهم كان على أيام الى بيدرسولى و سلملى لى جودة التعليم
و للا على المناهج المعلومة تاخدها هنا غير هنا كأن جسم الانسان بيختلف من مادة لأخرى
أحبها على نضافة مستشفياتها و حداثتها
و لا على عيانينها و غلبهم
على ريحة العيانين و الدبان الى عليهم كل ذنبهم انهم راحوا المستشفى فاترموا ذى كوم الزبالة
ولا على الست العجوزة الى كانت متسابة تعمل على نفسها على السرير
ولا على الأطفال الى محتاجة دم و مش لاقية نتيجة الجهل
ولا على كمية الكساح و سوء التغذية عند الأطفال
و سوء التغذية هنا مش يعنى مابيكلوش كويس لأ معناه ام بترضع ابنها مية رز عشان مش لاقية تجيب لبن صناعى
يعنى أم صدرها نشف من سوء التغذية و مش لاقية حتى فلوس مية الرز فبترضع الولد النقط الى بتنزل فبيموتوا هما الاتنين فى نهاية المطاف ولا الصمال
أحبها على ايه؟
على الست الى جالها فروس سى لمجرد انها خلعت ضرسها من عشرين سنة يا ريتها كانت شدته بفتلة !!
أحبها على الحقايق المرة الى شوفتها ان معظم ضحايا فايروس سى لا عمرهم عملوا علاقة غير شرعية ولا ادمنوا و لا حتى اتنقلهم دم فى عملية كل ذنبهم ان مام سوزان قالتلهم ادو ضهركوا للترعةة و خدوا علاج ووقاية البيلهريسيا علشان يصاب جيل كامل من فلاحى مصر بفايرس سى ثم الفشل الكلوى أو السرطان !!
و لا على احساسى الرهيب انى هساعد الاس لما أتعين - طبعآ بيعلمونى كويس و كل الحلات فى المستشفى مش على شفير الموت ولا حاجة و احنا عندنا أحدث المعدات لعلاج كل الحالات
ولا على كمية العيانين الى اتعالجوا غلط و ماتوا ولا حد سأل عنهم
"انت هنا تتعلم فى الناس زى مانت عايز الناس مالهاش قيمة لكن برة الغلطة تطير فيها رقاب"
"يا بنتى نضافة ايه لعلمك حال المستشفى المعفن ده انضف من بيوت العيانين الى فيها"
"حد يعقم الأوضة دى مش هما هنا بيعقموها ببيرسول برضه؟"
"لأ أنا مش هامتحنك هنا ريحة الأوضة معفنة"
الدكاترة قالولى كدة
أحبها على الناس الى بتاكل سمك و بتقزقز لب فى العناية المركزة
و لا على الطلبة الى جالهم جديرى مائى و سل و هما بيكشفو على العيانين
ولا على المجارى الى طافحة على طول
لسة فاكرة لغاية دلوقتى استنجاد شيخ الجامع فى المستشفى لأى حد انه ينقذ الجامع و المستشفى من المجارى
بس الشهادة لله المجارى قلت و عدد التكييفات فى غرف الدكاترة زادت هو صحيح غرف العيانين مافيهاش ولا حتى مروحة بس أهم حاجة الدكتور يتبصط
أخيرآ أطالب القنوات بعدم اذاعة
scrubs w gray's anatomy w ER
و كل هذه المسلسلات المضللة التى لا تعكس الواقع حفاظآ على الطلبة المقبلين على دخول الجامعة
عارفين أنا يمكن بحب الكلية دى عشان بحسها مثل مصغر لمصر صحيح مثل أليم لكن واقعى
فى نفس الوقت الى تلاقى فيه ناس بتصوت على ميت فىيه ناس بتزغرذ على مولود أو شفاء حد
فى نفس الحتة الى فيها اهمال فيه عمليات بتتعمل على اعلى مستوى و دكاترة عباقرة رغم قلة مرتباتهم
فى نفس الوقت الى تلاقى دكتور عمال يهزق و يعقدد الى تحته بتلاقى واحد بيعلمهم اكنهم ولاده
فى نفس الوقت الى فيه دكاترة مابتعرفش تشرح فى دكاترة شرحهم عبقرى
فى نفس المكان الى فيه رشوة و غش و محسوبية و ناس متسلقين و ناس لؤمه فيه ناس يخدموك بعنيهم من غير ماتعرفهم
عادى ما احنا بلد المتناقدات !!