من ساعت ماتلغت كلمة الاشتراكية من الدستور وانا قلبى مش مطمن
قبل ماتكلم أحب أقول شوية حقائق
حوالى40%من الشعب المصرى يعيشون تحت خط الفقر
مستشفيات التأمين الصحى بتبقى للعاملين بالدولة
اما بقيت الناس فا بيروحوا يتشخصوا فى المستشفيات التعليمية و بعد كدة اى علاج لازم يكون بطلب للعلاج على نفقة الدولة
حتى المستشفيات الحكومية الأقسام الآدمية الى تصلح فيها غير مجانية
الى فهمته انهم ناويين يخلوا شركة استثمارية هى الى تقبض الفلوس بتاعت التأمين و هى الى تتحكم فى أسعاره
مع ان التأمين ده من الأساس كان معمول من فلوس الموظفين الى بيدفعوها كل شهر عشان يتعالجوا لما يتعبوا
نظام بقى تلاقى الشركة عملت أنظمة للموظفين و شرايح
الى بيمرض كتير ليه تخفيض و كل ماخد أدوية أكتر تدفع أقل
و فيه تأمين بيزنيس وده مابيعالجاكش اقل من استشارى واخد دكتوراه من برة
و تأمين ايزى جو ده بقى الى بيعالجك دكتور نص لبة واخد ماسترز او دكتوراه من مصر
و تأمين للى صحتهم تمام دول بقى صلاحية أكتر لكن ادوية و اهتمام اقل و غالبآ الى بيكشف عليهم بيبقى معيد
و العمليات الكبيرة تبقى بالسحب اطلب 0900 و كل وا تطلب اكتر فرصتك فى العملية هتكبر
و بعدين تيجى شركة قابضة تانية تنافس
فيقولك فرصة لعملاء الإيزى جو دكاترة استشاريين هيكشفوا عليكم كل شهر ببلاش
أما عملاء البومب فلقد مددنا صلاحية الكشف الى ما بعد المعاش
و تطلع اعلانات بقى "صحتكوا أمانة فى ادينا سراءكو الشركة الرائدة فى عالم التأمين الصحى فى القاهرة و باقى المحافظات"
" لأن شركتنا تؤمن بوجوب تقديم الأفضل اليك لذا نحن ندلل دكاترنا و نغذيهم أفضل أنواع البرسيم "
"تذكرتين رحلة الى تايلاند مع كل عملية كبيرة"
الفلوس و الخصخصة و مص الدم بقى فى الأغذية الضرورية و سكتنا فى التعليم و سكتنا فى الأدوية و ألبان الأطفال و سكتنا حتى دخل فى الدين و خرسنا
بيقولك أهم حاجة تكون عايش
يا عم سيبك أهم حاجة الصحة
طول منا بصحتى تولع الدنيا
الأكل غالى لكن ربك كريم مافيش طير بينام من غير عشا أهم حاجة الصحة
أهه الصحة هتتاخد منكوا ياحلوين هتعملوا ايه بقى؟؟
و للشعب المصرى العظيم بعد التحية أحب اقوله
احنا تنابلة السلطان................
ناكل نشرب وننام
أديكوا لا هتلاقوا تاكلوا ولا تشربوا ولا حتى هتناموا
..........
اخيرآ الدكتور قبل اى شيئ انسان صاحب رسالة سامية وهى علاج جسد الانسان
و مع زيادة الجشع فعمله فى التأمين الصحى مع الراتب المتدنى الى بياخده هو كان الحاجة الإنسانية الوحيدة الى بيعملها لأنه كان بيشفى ملايين تقريبآ ببلاش
و رغم فرحى انهم زودوا مرتبات الدكاترة "حاجة بسيطة بس احسن من (120)جنيه فى الشهر" لكن لو ده مبرر انهم يطحنوا الغلابة فبلاها الفلوس
.............................
حتة فرنسا كدة على الماشى
كانوا عايزين يعملوا قانون شبه ده بس فى حاجة تانية قام الطلاب عن بكرة ابيهم نزلوا الشوارع و هددوا باسقاط الحكومة لغابة مارجعوا فى كلامهم
أما احنا والله لو جابولنا قانون بيقولك من حق أى شرطى التبول على شعر أى واحد محادش هيتكلم يمكن يس الصلع هيحمدوا ربنا ان معاندهومش شعر
ماهو احناشعب ماينفعش يحكمنا غير أمثال الحاكم بأمر الله
اهو من كتر اررى على الفرنسويين جالهم الى مش بس شبه حسنى لااه ده نسخة طبق الأصل من حبيب العدلى
ياللا عقبال ما الشرطة تقلب نظام الحكم و نهييييييص