بنيت المجد بين اللإهرمين

و بعد كدة نسيت!

" يا هانم لو كانت مصر بتاعت الحكومة تاخذها مش عايزينها بس يسيبونا نسافروا منها "
واحد من ضحايا الشرطة

" هو لو واحد ياهودى مصرى و قامت الحرب بيننا و بين اسرائيل يحارب مع مصر وللا اسرائيل؟ "
" اسرائيل طبعآ "
" نعم؟! ليييه؟ مش مصر بلده ؟"
" الإنتماء للدين اهم ذى ما المسلمين الأمريكان رفضوا الحرب فى العراق"
"فى فرق ده كان اعتداء دون وجه حق مش دفاع عن البلد ! "
" و بعدين الإنتماء للدولة من التديّن !! "


" الواحد عايز يشوفلو أى جنسية ياخدها و يهج بقى!"
"على فكرة مش اى حد ياخد الجنسية الإسرائيلية"
"نعم!! ما انا لو اتجوزت واحد اسرائيلى هاخد الجنسية"
"هههه ياهودى مين الى ضحك عليكى و قالك كدة؟ "
" لو كدة كنت اتجوزت واحدة إسرائيلية "
" آه يا معلم يا سلام الجواز الاسرائيلى يدخلك فى كل حتة
يابنى اسرائيل دى ولاية امريكية
الجواز ده يخليك تروح فى اى حتة و كل البلاد تحترمك "

" يا دكتور هو الأحسن المعادلة وللا الزمالة؟"
"انتوا عايزين تسافروا فين؟ "
"اى حتة اهم حاجة مانقعودش هنا !! "
" دول الخليج زمالة لو ليك حد فى أمريكا معادلة "
"على فكرا انجلترا افلت حاجات كتير جدآ "
" انا رحت سيشن فى الأميديست عن المعادلة و كلمونا عن المعادلة الكندية "
" ارميكا صعب اوى دلوقتى"
" أيوة ماهو عشان كدة اصحابى راحوا سيشن فى اسكندرية عن الهجرة لكندا و كدة "
" اممم طيب و ايه نظامها "
" صعب و لازم بوينتس و فبلم كدة "
" طيب كدة هنعمل ايه؟ "
" ضلمة !! "
"لأ انا لازم افك مالبلد دى!! "

عدى علينا عصور اضمحلال و تخلف لكن ماحدش عمل فينا ذى ما النظام ده عمل فينا
دمر الشخصية المصرية قتل فينا روح الحياة و روح الإنتماء
بقينا مجرد كائن بيجرى وراء لقمت العيش مش مهم تيجى اذاى ولا مهم على حساب مين
متساقين ذى الأغنام ناكل و ننام لا كرامة و لا ارض بيهمونا ..اللى عنده فرصة يهج من البلد هيهج من غير رجعة و بأى طريقة حتى لو باع بلده
و لو سألت حد انت ليه بتعمل كدة هتلاقى نفس الإجابة مصر عملتلى ايه عشان احبها ؟!!

نسينا سر وجودنا نسَونا ايه الى بيفرقنا كبشر عن الحيوانات
حتى قتل فينا روح المبادرة الشخصية
"ليه ابقى كويس ماهو كدة كدة مجهودى لا هايفيدنى ولا النظام هيسمحلى اطور نفسى"

يا ربى مصر دى مش بلد لسة متجمعة بقالها ثلاث سنين
مصر دى قديمة قدم الزمن مصر حضارة و تاريخ و شعب عتيق عاش طول السنين فى وئام
مهما غدر ناسها ببعض و مهما انحط شأن المصريين و مهما ماتت روح الإنسان
الأرض باقية مهما حصل
مش هييجى نظام على آخر الزمن يكرَه شعبها فيها

ياربى لو كلنا مشينا منها مين هيستحملنا
و بعدين اى بلد هنروحها هنبقى مواطنين درجة عاشرة مهما اغتنينا هنبقى اقل
لأن الى مالوش كرامة فى بلده مالوش كرامة فى اى بلد تانية!

مصر دى عاملة ذى الأرض الخصبة الى ورثها اجيال ورى بعض و بعدين جه ناظر عليها سرقها و دمرها
نطرد الناظر و ننضف الأرض و نعمرها ولا نسيبها للناظر و ندور على اراضى ناس تانيين؟

الأرض هى أصلنا ورصيدنا أجدادى ادفنوا و هما بيدافعوا عنها عشانى
اهلى حلموا هنا بمستقبل أحسن لبة
كل ذرَة من ترابها فيها ذكرى قديمة

أنا مصرية مش هسيب أرضى و هفوق لبلدى و أضحى بنفسى و أطرد الناظر وأعمَر الأرض!!