أنا جالى شيزوفرينيا
مش فاهمة حاجة!!
حد يفهمنى مصر إيه بالظبط؟
مصر أرض الجولف و المعادى؟
و للا مصر بولاق و الدويقة؟
مصر قصور العبور و دريم لاند و مدينتى؟
و للا مصر القرى و النجوع؟
مصر هى الأشكال الى فى سيتى ستارز بيضحكوا؟
و للا الناس اللى فى المترو الى نازل عليها المسكنة و الذل؟
مصر الناس الى لو شافوا اتنين بيحبوا بعض بيساعدوا؟
وللا مصر الناس الى بتحرم أى مشاعر جميلة؟
مصر العسكرى الى وقفلى الشارع عشان أعدى؟
و للا العسكرى الى عاكسنى قدام القسم؟
مصر العسكرى الى رفض يحرس سفارة اسرائيل؟
وللا الأمن المركزى الى بيتحرش بالناس فى المظاهرات؟
مصر واحدة منقبة؟ وللا كباريه؟
مصر دينها مظاهر ؟
و للا تدين جاى من القلب عميق؟
مصر فيها تشدد السعودية؟
و للا انحلال المنطقة الحمراء فى امستردام؟
مصر بلد الأمن و الأمان و المشى فى الشارع لغاية الفجر؟
وللا بلد الزوار الليليين و سفاح المعادى؟
مصر الناس الى لو سألتهم عن شارع يضحكوا فى وشك و يجوبوا بكل ترحاب؟
و للا الناس الى لو شاورتلهم يدوك ضهرهم بقرف؟
مصر عربية بورش آخر موديل؟
وللا مصر عربية كارّو بحمار ؟
مصر المظاهرات و القضاه و اضرابات عمال الغزل ؟
و للا التخازل و الجبن و المواسلة و النفاق؟
مصر الشرفاء الى يجوعوا و لا يمدوش ايدهم؟
وللا الموظف الفهلوى الى مايشتغلش غير لما يقبض المعلوم؟
مصر الخير؟
وللا الرشوة و الفساد؟
مصر الزرع و الخضرة النوادى؟
و للا المجارى و البلاعات؟
مصر مستفيات التجميل؟
وللا البيلهارسيا و فيروس سى ؟
مصر مدارس دولية ؟
وللا أطفال بتموت من المجاعة و الهزال و الكواشركور؟
مصر دار الفؤاد؟
و للا الدميرداش؟
مصر هبة النيل؟
و للا الحيوانات النافقة؟
مصر شجر؟
و للا التلوث الى قتلنا؟
مصر ميلودى و مازيكا؟
و للا قناة الناس "مش عارفة ايه دولتها بس آهى عالنايل سات"؟
مصر حلقات ذكر؟
وللا هيد بانجينج و ميتال جيجز؟
مصر دور أيتام و ناس بتسعى فى الخير؟
وللا عيال مترمية فى الشوارع حالهم يصعب عالكافر و ما يصعبش علينا؟
حتى شخصية المصرى مش قادرة افهمها
المصرى الى يبيع هدومه عشان يساعد أهله و جرانه؟
و للا الى يبيع أبوه و يطرد أهله فى الشارع؟
المصرى الى بيقف بالساعات قدام طابور العيش و ماينفاعش ياخد بأكتر من جنيه؟
و للا الى فى سبينيز مالى التروللى شكولاتات ؟
المصرى صريح و للا ومنافق؟ غشاش و للا بيعرف ربنا؟
مين بيحب أكتر شيخ الجمعة و للا روبى؟
المصرى الى مابيفرقش بين اى حد الى المسلم بيروح فرح صاحبه المسيحى فى للكنيسة و العكس؟
وللا لاى بيسألك اسمك ايه قبل أى شيئ عشان يعرف ديانتك و مش بعيد يشتم دينك قدامك أو وراك؟
حتى الشيخ
مع الجهاد؟ وللا خلاص مع السلام و سلملى عالكرامة؟
قضيته نصرة دينه ؟ و للا بس بيفتى فى وجوب اطاعة ولى الأمر؟
مين الأهم؟
التدين بالمظاهر؟ انى ماسلمش ؟ مامسكش ايد الى باحبه؟ أو اكلم طوب الأرض و آجى على باحبه و أقول حرام؟
و للا إنى أضحك فى وش الناس و أساعدها و ماكذبش و لا انافقهم؟
ليه دائمآ شكلنا بيحدد حياتنا و رأى الناس فينا؟
لابس كذا شعره كذا يبقى كذا
أما لو كذا يبقى كذا
حياه كلها اطارات و توقعات مش عارفة مين حطها؟
مين قدوتى؟
حتى الى كنت فاكرانى متأكدة من رأيى منه طلعت غلطانة
حسنى ده؟
انسان؟ حيوان؟ جماد؟ نوع آخر من المخلوقات غير مصنف؟
حكومته دى؟
حثالة المجتمع؟ وللا لمامة البشر؟ و للا عملنا الأسود؟
هل نستحق الى بيعملوه فينا؟
ايوة دا عقاب ربنا عالى بنعمله؟ دى جنود متصلطة علينه؟ و للا سحابة و هتمشى؟
عارفة انه أى بلد فيه التشدد و التسيب و الكويس و الوحش
لكن لما يكون معظم المصريين على النقيدين
يا حشاش و مغيب
يا متأصلة فيه ثقافة تدمير الآخر لمجرد انه مختلف عنه
لما يختفى الحل الوسط لما يكون السواد هو اللون السائد
لما تضيع شخصية المصرى و يضيع انتماؤه
أنا عارفة انه الإنتماء للدين لازم
لكن مصر زمان كانت هى دين المصريين و حبهم و ولاءهم و حتى الهامهم
لكن دلوقتى بحس ان مصر آخر حاجة ممكن نفكر فيها
سعات بحس انه لو عرضوا علينا جنسية تانية و شوية فلوس هنسيب البلد و نمشى
هو احنا مين أصلآ؟
احنا فعلآ ولاد مصر أحفاد الناس الى بنوها زمان؟ و للا احنا سكان جداد جراد متزقة ؟
احنا ولادها حماتها الى نحفظ عليها بروحنا؟ و للا احنا هنا عشان ناكل و ننام ذينا ذى أى كلب مرمى جمب الحيط راضى بحتة العيش المكسر الى بتجيلة من سيده؟
يا عم ده حتى الكلب عنده كرامة!!!
الله يخرب بيت الى كان السبب و يهدى الى إدوه الفرصة
و لو مإهتدوش و فاقوا لنفسهم و حسوا ان الحرية هى قوتهم و كرامتهم يبقى يستاهلوا الى يجرالهم و يتبادوا أحسن