من كام يوم وأنا رايحة اعتصام الضرائب أنا و أمينة صديقتى عدينا على نقابة الأطباء أو دار الحكمة بس بعد انتهاء اعتصام الأطباء للأسف

المهم وانا هناك قابلت الدكتورة منى مينا و الدكتور أحمد حامد و اكتشفت انهم هما ومجموعة تانية من الأطباء عاملين بلوج أطباء بلا حقوق
بلوج كدة بيحكى فيه الأطباء مشاكلهم و الضغوطات الى بيتعرضولها
و بيحاولوا من خلال تجميعهم لبعض إنهم يعملوا حاجة للأطباء عن طريق النقابة

هما بيرحبوا بأى حد عايز يساعدهم و قالولى يا ريت البلوجرز الدكاترة أو الطلبة يشتركوا معانا
فلو أى حد عايز يساعد ممكن يبعتلهم عالميل بتاعهم
atebaa_bela_hokook@yahoo.com


هما كمان عاملين استبيان عن آراء الدكاترة فى المنظومة الطبية الى عايز يجاوبه ممكن يدخل على البلوج و ينزله

حالنا السيئ كتلاميذ أو دكاترة مش محتاج انى أوصف أو اشرح هو اذاي سيئ
كلنا حاسين بالحال الى وصلنا ليه كجزء من المجتمع المصرى الى بينهار حاليآ
و لو موقفناش و حاولنا ناخد حقنا هيبقى ذينا ذى أى حد مخادش الثانوية العامة ولا تعب ولا قضى أكثر من سبع سنين من حياته بيدرس
ده غير سنين الدراسة الى بعد كدة

فى كل دول العالم الطبيب ليه وضعه المادى و الأدبى المحترم قبل حتى مايفكر يشتغل
واحنا هنا مهددين بالجلوس على القهاوى و العمل بشكل مهين لتوفير لقمة العيش
ربنا يخلى أهل اى حد مننا بيصرفوا عليه بس لو فضلوا يصرفوا دائمآ هيكون فيه خلل

عشان مايتهضمش حقنا
عشان نعيش حياة كريمة
عشان نعالج الناس بطريقة سليمة
 عشان تبقى ظروفنا مهيئة بانها تجعلنا غير مهملين فى حق أى انسان بنعالجه
 عشان المناهج تتغير وطريقة التعليم تتغير
لازم نتجمع كلنا