جدي كان بيقولي الزجل ده عن اهتمام الأم المصرية بإبنها كأنه ماجاش ولا حصل ذيه
للأسف مازال نفس المفهوم ساري حتى الآن
يمكن بس جيلنا أحسن شوية 

يام ابراهيم ... براهيم ابنك اســـــم الله عليــــــــه
محطوط له منديل علي وشه رح يعمـــي عـينـيـه
●●●
مكلفتاه ليه يا وليه ليـــه كل ده ليـــــه؟
لما احنا حنبص في وشه رح يحصــل ايــــه؟
●●●
انا مشفتش ناس زيك ولا اهـــل الصـين
مين اللي بتخبي ولادها زيـك كــده ميـــن؟
●●●
و آل معلقاله في رقبته فـــرده قـبـقـــاب
صغيره .. و عدس و فلفل ملفــوف في حجــــاب
●●●
و عقد ازرق علي صدره و حجــاب و صــليــب
و خمسه و خميسه ف قورته امـــا الجــلاليــب
●●●
مرقعاهم ميت رقعه كســتور عـلـي شـــاش
علشان يعيش . ابن الصرمة ما انشــالله مــا عــاش
●●●
ملزقه تلتين راسه قـــال ايه بفاســـوخ
علشان يعيش و ان عاش يطلع لــطخ و ملـــطوخ
●●●
قال حاطه منديل علي راسه لا النــــاس يشوفــوه
بالشكل ده يطلع ابنك خـــواف و جبـــــان
●●●
لو شاف دوباره يروح صارخ و يـقول "تعبــــان"
يا بنت مصر سيبك من ده و بــــلاش تخريـــف
●●●
و خلي ابنك واد "راجل" و تــمللي نضيـــف
اشمعني مبروك يا ستيته والا ابــو شلاضـــيم
●●●
اللي ان باعوه ما ارضاش اخده حتـي بملـــيم
اللي العماص غطي حواجبه و حــايعـمي عــينيـه
●●●
الناس لما تشوف وشه تـحسد فـيــه ايـــــه؟
اشمعني بس يا شلبية ابن الخواجـــــــات
●●●
اللي ان جرحتيه من جرحه ينـزل شربـــــــات
اللي تلاقيه شعره مهدل و كانـــــه سلـــــــوك
●●●
من الدهب. و كمان لبسه حلو و مسبوك
اشمعني امه مبتخافشي ولا تخزي العين
●●●
و هو اجمل ميت مره م الواد حســـــنين
يا بنت وادي النيل ابنك فكــيه .......
●●●
خليـه
يتهني بالشمس دا عطفك ده راح يـئذيــــه
خلي الولد من دول يطلع طول عمـره شجــاع
●●●
مش يبقي خواف و يهوش معُـــار جعجـــاع
متعلمهش يخاف ياختي و الدنيـــــا نهــــــار
●●●
يمكن ف يوم مصر تعوزه عـلي خط النـــــــار
يمكن ف يوم مصر تعوزه عـلي خط النــــــار