في 4 نوفمبر القادم ستبدأ الانتخابات الرئاسية الأمريكية ليختار الشعب الامريكي من بين باراك اوباما و جون ماكين
من كتر ما الانتخابات الأمريكية واخدة حيز كبير فى الاعلام بيضطر الواحد يتابعها

أكتر حاجة مضايقة الأمريكان من مكين انه عجووووووووووز ..ولو كسب الانتخابات هيكون اكبر رئيس في تاريخ امريكا

الامريكان مش متأكدين ان ممكن حد في سن ماكين 72 سنة يمسك ادارة البلاد وتكون قدراته العقلية والجسمانية تسمحله بده

72 سنة وعاملين ازمة!!.. ماهو اللي مشفش يقول عدس

مبارك أكبر منه بييجى 10 سنين .. واغمى عليه قبل كده في مجلس الشعب بسبب قصور في الدورة الدموية.. ومعرض في اي لحظة لحدوث جلطة في المخ.. ده غير اللخبطة في الكلام حتى لما بيقرا الخطابات المكتوبة بيتلخبط في الكلام بشكل غريب مما يدل على قصور ما في وظائف المخ

وبالرغم من كده الراجل لسة بيحكم

السن مش مشكلة دي سنة الحياة زي ما بيقولوا لكن لكل وظيفة سنها المناسب لها.. الانسان لما يوصل لسن معين ممكن يشغل وظيفة استشارية..انما يمسك منصب اداري ويتخذ قرارات تحدد مصائر اخرين!؟..صعبة
لكن كمان يبقى رئيس دولة!؟.. لأ.. مينفعش

لكن الحقيقة ان اللي في سنه خلاص خد من الدنيا اللي هو عايزه و بيقضي آخر أيامه يلعب مونوبولى مع احفاده اللى هي بالمناسبة اتعملت بعد مبارك.............. احنا علشان متعودين عليه من 27 سنة مش حاسين هو كبر قد ايه

الجميل في الأمر انه عمره ما اعترف بسنه.. ولا مرة مثلا قال انا راجل كبير حتى من باب الهزار.. دايما مُصر انه اصبى من أصبى واحد.. ولا صباح اللى هي بالمناسبة قده فى السن

عمره ما اتعجز على عصاية رغم انه عنده تيبس في فقرات الظهر وبيعرج في مشيته
ولا عمرنا شوفناله شعراية بيضاء في راسه
الراجل ده خارق والله لا بيعيى ولابيتجعد ولا حتى بتتكرمشله بدله
ولو حد مننا اتكلم (و قل ادبه واتجرأ على الموضوع الشائك و المقدس ده) هيكون مصيره ... زي مانتوا عارفين

النهاردة 14 اكتوبر 2008
زي النهاردة من 27 سنة تولى مبارك الحكم

النهاردة هنبدأ الكتابة فى المدونة
هنبدأ بهدف ان احنا نلاقي 81 حاجة أصغر من مبارك لغاية 4 مايو.. ودي هتكون هديتنا له في عيد ميلاده ال81

تعليقاتكم ومشاركاتكم ومساهماتكم معانا مهمة جدا.. سواء على المدونة او على الايميل

ياللا يا جماعة عايزين نشاط
---------------------------------------------

المدونة مستوحاة من مدونة امريكية مناهضة لماكين تحمل اسم "
أشياء اصغر من المرشح الجمهوري ماكين"
............................................................
آآآه نسييييييت ده لينك المدونة
:D:D:D:D:D