امبارح كان من اسوأ الأيام فى حياتى
المية اتقطعت و حاجة تقرف
اعدنا مستنيين الميية انها تيجى ما بتجيش الى يقولك هتيجى دلوقتى واللى يقولك هتيجى كمان تلات ايام
و طبعآ الشعب المصرى بيعشق الإشعات ذى عينه
نفسى افهم اذاى المياه تقطع عن نص القاهرة اذاى تقطع على مناطق كاملة فيها مستشفيات و مدارس و مرافق عامة كتير
اللذيذ فى الأمر ان ولا حد اتكلم
لأننا بالمختصر شعب مدمن ضرب على القفا على رأى الأستاذ المبجل نبيل لوقا
ده الميا مرة اتقطعت فى باريس ساعتين وزيرين فى الحكومة استقالوا و دول الشعب كله يستقيل و محادش فيهم يتزحزح من مكانه
و بعدين اذاى اتجرأ و اقارن مصر بفرنسا اذاى اقارن شعب قام عن بكرة ابيه ونزل الشارع عشان مايماشوش قانون الحكومة كانت عايزاه بشعب حكومته عملته حمار يتركب و بيقول كمان
ياللا ما علينا انشالله يا شيخ يتمسمروا فى كراسيهم هى مصر كانت بتاعت أبونا
ادينا جايين على الدنيا زوار محادش واخد منها حاجة
الحمدلله ان الواحد مش عايش فى الصمال وللا الكنغو
و نروح بعيد ليه الحمدلله انها جت على قد المياه ربنا بارضوا راحمنا مش احسن ما كان عمال الزبالة بتوعنا كمان يضربوا
احنا هنتبطر على النعمة
سامحنى يا رب
المهم الميا جت و اخدت الدوش التمام والحمدلله عرفت انام
صحيت صاحبتى اتصلت
اذيك اذيك الكلام جاب بعضه
و بعدين فاجأة الاقى مامتها بتزعق املى البانيو بسرعة الميا هتقطع اربع ايام ورا بعض