Er7amna ba2a w ghooor



عزيزى حزنى مامى بتسلم عليك و بتقولك ماتنساهاش فى الواسطة الى طالباها منك عند عمو حسن القهوجى عشان يشغل ابن خالتى خريج هندسة communication

و بتقولك خلى الشرطة تخف ايدها عن ابن عمى الى ماحبوس فى قضية رأى... مرة شتيمة و مرة أغتصاب و مرة ضرب مش لازم كلة ضرب و اغتصاب يعنى...


الاهى يخليك خلييهم يخلصوا مستشفى السرطان لحسن جارتنا فتحية ابنها اللأول مات و لسة جايلها ورقة الموافقة على العلاج على نفقة الدولة مع شهادة الوفاة... عشان خاطر جوجو ماتخليهاش تخسر ابنها التانى...

و أحب اشكرك قضية الرشوة الى كانت معمولة ضد الأستاذ حسن جارنا حفظوها ضد مجهول لمل عرفوا انوا فى الحزب الوطنى رغم ان كل الأدلة ضده ... اصل سر الحزب باتع وانت سيد العارفين...


بس والنبى طلب صغنن كمان ... العيال اخواتى عايزين ياكلوا لحمة فى العيد... خليهم يخفضوا سعرها عشان الأغنية يعرفوا يشتروا خرفان و يوزعوا علينا...


الواد محمد ابن البواب اتقبض عليه امبارح و هو طالع من الجامع بتهمة اطلاق اللحية وغلاوتك يا باشا ده واد خمرجى و بتاع ستات ذقنه مربيها عشان مش لاقى حق الموس... أما الجامع يا باشا فكان رايح يسرق جزم... حرامى يا باشا يعنى و فى السليم....
يا بيه ولاد الشوارع كتروا والأغنية اديقوا من مناظرهم و ايمانآ منك بحل وسط (مشاكل الشعب) اطلب منك تلمهم و تعدمهم فى ميدان عام.... اهو تبقى احن عليهم من اهلهم و تشيعهم على ربهم...


يا باشا مى جارتى بقالها شهرين عندها اكتآب حاد اصلها بعيد عن السامعين كانت فى وسط البلد ساعت الأحداث اياها و حصل الى حصل... يا بيه دى كانت مع خاطيبها بينقوا النجف .... كانت عايزة تبلغ بس خافت يا بيه لاحسن يحصلها الى حصل للراجل بتاع بولاق... و كمان مامتها قالتلها الحكومة نفت هو انت هتعرفى أحسن من الحكومة ... حتى امى برضوا عقلتها و قالتلها انت عايزة تعرى نفسك... عايزة الناس يقولوا عليكى اييه.... ماتخفش انا قلتلها العيب مش على الشرطة الى سبتك للكلاب ولا الحكومة الى مجوعاهم... العيب عليكى مش معنى انك لابسة محترم انك تنزلى الشارع.... كل بنات جنسك لازم يتحبسوا عشان ميفتنوش الشباب...



يا بيه كل ما أكلم حد من الأجانب الجهلة الاقيه مايعرفش عن مصر غير الأهرامات و الجمال... ممكن يا بيه تبعت وفد من فنانى شارع محمد على يوضح للغرب مدى اهمية الكبارى فى عصرك؟ و يا ريت تكون الميزانية كبييرة عشان الوزرا بتوعك يتعشوا دول غلابة....و أقترح تدعييم الوفد بالولد المعجزة اللى بيتكلم 5 لغات الى بعتووه يتكلم باسم مصر ساعة المنديال ...أصله وشه حلو علينا... إللا يا باشا صحيح هو قريب المدام؟؟



معلش طولت عليك .... أنا عارفة وراك مشغوليات كتير و هتتعطل عن مؤتمراتك الكتير الى بتحل فيها مشاكل الكون...


و أخيرآ


"هشتكنا و بشتكنا يا ريس دنت رئيس والنعمة كويس"


سلاحف!!
enough is enough Blog/